Sacsietka X aficyjna dazvoliła svaim karystalnikam publikavać erotyku i parnahrafiju
Sacsietka X (były Twitter) abnaviła svaje praviły, aficyjna dazvoliŭšy karystalnikam raźmiaščać na płatformie kantent dla darosłych.
«My ličym, što karystalniki pavinny mieć mahčymaść stvarać, raspaŭsiudžvać i atrymlivać materyjały, źviazanyja z seksualnaj tematykaj, kali jany stvarajucca i raspaŭsiudžvajucca pa ŭzajemnaj zhodzie», — havorycca ŭ praviłach.
Zhodna ź imi, karystalniki zmohuć publikavać kantent «jaki demanstruje seksualnuju aktyŭnaść darosłych ludziej abo aholenaje cieła», pry ŭmovie, što jon budzie naležnym čynam adznačany i nie budzie raźmiaščacca na» bačnym miescy», naprykład, na avatarku profilu. Udakładniajecca, što praviły raspaŭsiudžvajucca na ŭvieś kantent dla darosłych, uklučajučy animacyju i materyjały, stvoranyja pry dapamozie štučnaha intelektu, piša «Mieduza».
Sacsietka taksama paprasiła karystalnikaŭ, jakija rehularna publikujuć kantent dla darosłych, unieści źmieny ŭ Nałady svaich profilaŭ. Takim čynam publikujemyja materyjały buduć supravadžacca papiaredžańniem pra źmiest. Karystalniki, jakija nie dasiahnuli 18 hadoŭ abo nie pakazali svaju datu naradžeńnia, nie zmohuć ich prahladać.
Časopis Variety adznačaje, što płatforma nikoli nie zabaraniała publikacyju takich materyjałaŭ. Bolš za toje, kala 13% usich dopisaŭ na płatformie ŭ 2022 hodzie ŭtrymlivali kantent dla darosłych.
Prafiesar kamunikacyj Karnielskaha ŭniviersiteta Bruk Eryn Dafi ŭ kamientary Variety adznačyła, što aficyjny dazvoł X na publikacyju pastoŭ z utrymańniem dla darosłych «dobra ŭzhadniajecca z markietynhavaj stratehijaj kampanii paśla prychodu Iłona Maska». «X biezumoŭna pravakacyjny i imkniecca adździalić siabie ad «biaśpiečnych brendaŭ-kankurentaŭ», takich jak Meta, YouTube i TikTok», — patłumačyła jana.
Kamientary