«Mahu jechać dadomu? Praŭda? Dziakuj». U Poznani sud vynies prysud pa spravie dvuch biełarusaŭ, abvinavačanych u špijanažy

Andreja R. i Dźmitryja N. zatrymali ŭ krasaviku 2022 hoda i z taho času jany doŭhi čas utrymlivalisia pad vartaj. Pavodle paviedamleńnia vydańnia Gazeta Wyborcza, za niekalki tydniaŭ da prysudu Dźmitryja N. vyzvalili z-pad varty, ale zabaranili jamu pakidać Polšču.

Sudovy praces pačaŭsia ŭ kastryčniku 2023 hoda. Ale tady sud pastanaviŭ, što, pakolki sprava źviazanaja ź dziaržaŭnaj tajamnicaj, publičnym budzie tolki čytańnie abvinavaŭčaha zaklučeńnia, a dalejšy praces projdzie za začynienymi dźviaryma.

U paniadziełak, 29 krasavika, prysud abviaścili, častka jaho taksama była zasakrečanaja.

Śledstva mierkavała, što mužčyny pryjechali ŭ Polšču dla pracy kiroŭcami, adnak asnoŭnaj ich metaj było nazirać za vajskovymi i cyvilnymi abjektami, jakija majuć krytyčna važnaje značeńnie dla abaranazdolnaści Polščy. Paviedamlałasia, što heta abjekty na zachadzie krainy.

Śledstva mierkavała, što biełarusy źbirali infarmacyju mienš za miesiac — z 6 sakavika pa 4 krasavika 2022 hoda. Sud paličyŭ dakazanaj vinu tolki adnaho z padsudnych — Andreja R. Pry hetym sud adznačyŭ, što dokazaŭ jaho viny było mała, ale heta śviedčyć «pra vysoki prafiesijanalizm abvinavačanaha i ŭmieńnie paźbiehnuć vykryćcia», paviedamlaje partał Codziennypoznan.

Sudździa Katažyna Volf patłumačyła, što pakarańnie — try hady pazbaŭleńnia voli — choć i moža padacca miakkim, ale adekvatnaje złačynstvu. Sud uličyŭ nievialiki termin zboru danych, a taksama adsutnaść dokazaŭ taho, što padsudny paśpieŭ kamu-niebudź ich pieradać.

Viadoma, što abarona maje namier asprečyć hety prysud, pakolki Andrej R. nastojvaje, što nievinavaty.

Dokazaŭ viny Dźmitryja N. sud nie znajšoŭ. Tak, abvinavačvańnie nie dakazała, što ŭ mužčyny mielisia fota abo apisańni vajskovych abo cyvilnych abjektaŭ, krytyčna važnych dla abaranazdolnaści dziaržavy. Faktyčna sprava ŭ dačynieńni da mužčyny była pabudavanaja tolki na padstavie jaho znajomstva z Andrejem R., ź jakim jany razam chadzili pa pakupki i na prahułki, piša Gazeta Wyborcza.

Pa słovach samoha Dźmitryja, jon byŭ znajomy z Andrejem R. tolki try tydni, razam jany chadzili ŭ kramu. U dačynieńni da Dźmitryja N. sudździa vyniesła apraŭdalny prysud, a taksama admianiła palicejski nahlad i abmiežavańnie na vyjezd. Ciapier jon zmoža pajechać u Biełaruś.

«Mahu jechać dadomu? Praŭda? Dziakuj», — pryvodzić reakcyju Dźmitryja polskaje miedyja.

• 5
• 0
• 2
• 6
• 3
• 4
• 7
• 0