Biełaruskamu futbalistu płacili pa $5 tysiač na miesiac, ale nie vypuskali na pole — absurdnaja palityčnaja historyja
Futbalist Andrej Chačaturan, jaki 2 vieraśnia adśviatkavaŭ 36-hodździe, u siezonie 2023 hoda na poli nie pravioŭ ani chviliny, ale pry hetym zastavaŭsia adnym z samych vysokaapłatnych hulcoŭ žodzinskaha «Tarpieda-BiełAZ» — i reč nie ŭ traŭmie. Kłub nie zdoleŭ pazbavicca ad vieterana ź vialikim akładam, a hulać jamu zabaraniła Minsportu, piša Tribuna.
Staŭ lidaram «Tarpieda-BiełAZ» i atrymaŭ palepšany kantrakt
Chačaturan hulaŭ za «Tarpieda-BiełAZ» z 2016 hoda. Da siońnia ŭ jahonym aktyvie 166 matčaŭ (66 kapitanam), jon zabiŭ 16 hałoŭ i addaŭ 24 pieradačy. Samy pradukcyjny siezon za kłub paŭabaronca vydaŭ u 2020-m: pravioŭ u čempijanacie 26 sustreč, zabiŭ 5 hałoŭ i daŭ 7 pieradač, a hałoŭnaje — dapamoh Žodzinu ŭpieršyniu ŭ historyi ŭziać bronzavyja miedali čempijanatu.
Pry hetym kantrakt u Chačaturana ŭ śniežni 2020-ha zakančvaŭsia, ale «Tarpieda-BiełAZ» tady było zacikaŭlena ŭ praciahu supracy z kapitanam. U studzieni-2021 ź im padpisali novuju damovu, prytym až da kanca 2023-ha. Jana pavyšała zarobak hulca prykładna da piaci tysiač dalaraŭ (źvierchu možna było napracavać jašče i bonusy). Hetyja ličby byli adnymi z samych vysokich u «Tarpieda-BiełAZ».
Ale za dva nastupnyja siezony Chačaturan pravioŭ usiaho 27 matčaŭ, u jakich vyznačyŭsia adnym hołam, tryma žoŭtymi kartkami i dźviuma čyrvonymi. Pieršapryčynaj źnižeńnia hulniavoj aktyŭnaści stała traŭma kryžapadobnych źviazak — u 2021-m chaŭbiek prapuściŭ praź jaje ŭvieś druhi kruh.
Tym nie mienš, admaŭlacca ad daśviedčanaha futbalista «Tarpieda-BiełAZ» nie śpiašałasia — toj zastavaŭsia častkaj kamandy. Umovaŭ kantrakta taksama nichto nie pierahladaŭ.
A što zdaryłasia ŭ 2023-m?
Apošniaja na siońnia hulnia futbalista ŭ formie «Tarpieda-BiełAZ» adbyłasia 12 listapada 2022 hoda. U zaklučnym tury vyšejšaj lihi žodzincy pryjechali ŭ hości da «Isłačy», ich kapitanam jakraz byŭ Chačaturan, adnak taho matča jon nie dahulaŭ — na 55-j chvilinie atrymaŭ čyrvonuju kartku za abrazu supiernika. Na toj momant žodzincy prajhravali 0:2, a paśla vydaleńnia kapitana prapuścili jašče raz.
Toj epizod, a taksama ŭ cełym nie samy vydatny ŭ piersanalnym płanie siezon, abumoviŭ budučyniu paŭabaroncy ŭ Žodzinie. U samym pačatku pieradsiezonki-2023, kali kamanda vyjšła z adpačynku, futbalistu było prapanavana šukać novuju kamandu. Chačaturanu prapanoŭvali albo pavodle ŭzajemnaj damoŭlenaści razarvać kantrakt, jaki dziejničaŭ jašče hod, albo syści ŭ arendu.
Paŭabaronca byŭ zhodny na skasavańnie damovy, ale tolki ŭ tym vypadku, kali «Tarpieda-BiełAZ» vypłacić uvieś zarobak da kanca dziejańnia pahadnieńnia, a heta amal 60 tysiač dalaraŭ. Kłub taki varyjant nie zadavalniaŭ. Chačaturanu prapanoŭvali kampiensacyju pamieram u miesiačny zarobak, ale heta nie zacikaviła hulca. Ad arendy jon taksama admoviŭsia, bo razumieŭ, što žodzinskaha akładu jamu bolš nichto nie pradubluje. Pry hetym hulca klikali ŭ «Minsk», ale biezhrašovy kłub jaho nie pryvabiŭ.
U vyniku Chačaturana vymušana pakinuli ŭ kłubie, ale «spuścili» ŭ dubl, dzie jon moh tolki treniravacca.
Hulać za moładź chaŭbieku nie dazvalałasia, pryčym nie praz pazicyju kłuba z metaj cisku, a pa zahadzie źvierchu — Chačaturan trapiŭ u «čorny śpis» tak zvanaha Minsportu za ŭdzieł u videa suprać hvałtu.
Ci to ŭ vychavaŭčych metach, ci to kab dać mahčymaść zasłužyć «prabačeńnie» ŭ łukašystaŭ, hulca rehularna adpraŭlali ŭdzielničać u prarežymnych mierapryjemstvach. Naprykład, na fota nižej pobač z Chačaturanam staić paŭabaronca Anatol Makaraŭ.
Kab apraŭdacca za asudžeńnie hvałtu, Makaraŭ byŭ vymušany dać pakajannaje intervju prapahandystam, ale ŭ vyniku tak i nie zmoh hulać za Žodzina — i pierabraŭsia ŭ «Arsienał» (Tuła) z rasijskaha D2.
Ci atrymałasia reabilitavacca spartoŭcu, pakul nieviadoma.
Adnak u situacyi z aŭtazavodcami cikaviejšym vyhladaje inšy momant.
Chačaturana «spuścili» ŭ dubl, ale pry hetym nie zmahli zrezać zarobak. Hulec uvieś siezon-2023 tolki treniravaŭsia z dublem «Tarpieda-BiełAZ», nie pravioŭ na poli ni chviliny ni za moładź, ni za asnovu, ale kožny miesiac atrymlivaŭ na kartku kala piaci tysiač dalaraŭ.
U vieraśni futbalistu spoŭniłasia 36, i jon maje namier hulać dalej. Chačaturan šukaje novaje miesca i ŭžo zajaviŭ pra cikavaść z boku niekalkich biełaruskich kłubaŭ. Kali kantrakt z adnym ź ich budzie padpisany, to možna budzie kazać pra toje, što niepryjemnaść z «čornymi śpisami» załahodžanaja.
Ciapier čytajuć
«Ja nie chaču adpuskać žyćcio». U piśmieńnicy Śviatłany Kurs rak na poźniaj stadyi5
Kamientary