Kolki možna zachoŭvać zamarožanyja pradukty i ci možna zamarožvać ich paŭtorna

Na hetyja i inšyja pytańni «Viačerniemu Hrodna» adkazała Natalla Marozava, doktar-hastraenterołah hrupy kampanij «Invitra».

Nakolki karysna ŭžyvać u ježu pradukty, jakija prajšli zamarozku

U zamarožanych praduktach źmiaščajecca mienš vitaminaŭ, čym u śviežych, ale byvajuć vyklučeńni. Naprykład, kolkaść karacinoidaŭ (papiarednikaŭ vitaminaŭ hrupy A) u morkvie pry zamarožvańni moža stać navat vyšejšaj za košt vymarožvańnia vilhaci.

A voś kolkaść białkoŭ, tłuščaŭ, vuhlavodaŭ, mikra– i makraelemientaŭ pry zamarozcy nie mianiajecca, tamu tym, chto sočyć za svaim racyjonam i ličyć kałoryi, białki, tłuščy i vuhlavody, taki sposab zachoŭvańnia praduktaŭ padychodzić.

Zamarožanyja pradukty karyśniejšyja za kansiervavanyja z dapamohaj dadańnia soli, cukru, vocatu, vendžańnia, advarnyja abo błanšyravanyja, padvierhnutyja termičnaj apracoŭcy.

Jakija pradukty nielha zamarožvać paŭtorna

U raślinnaj ježy vitaminy i minierały zastajucca praktyčna ŭ poŭnym abjomie. Zamarozka častkova mianiaje strukturu kletak miasa i ryby, ale karysnyja ŭłaścivaści, choć i ŭ mienšym abjomie, zachoŭvajucca.

Niekatoraja harodnina moža stracić svaje smakavyja jakaści: zielanina drenna reahuje na zamarozku, tamaty hublajuć i formu, i smak, ahurki paśla zamarazki nieprydatnyja da ŭžyvańnia, bulba stanovicca biez smaku.

Pry zamarozcy źnižajecca kolkaść vitaminaŭ u takich praduktach, jak śmiatana, johurt, śviežyja jajki, a taksama hublajecca ich adnastajnaja želepadobnaja kansistencyja.

Paŭtorna pradukty možna zamarožvać, ale jość vierahodnaść, što ich jakaść pahoršycca. Asabliva heta tyčycca praduktaŭ, jakija źmiaščajuć vadu — harodnina, sadavina, zielanina, kuryca i ryba, śviežaje miasa. Spakojna paŭtornuju zamarozku pieražyvuć sała, ciesta, śmietankovaje masła, syravialenyja i vendžanyja pradukty. Dla zachavańnia smakavych jakaściaŭ rekamiendujecca vakuumiravać pradukty.

Ci psujucca zamarožanyja pradukty

U kožnaha zamarožanaha praduktu i stravy jość svoj termin zachoŭvańnia. Naprykład, u bolšaści jahad i harodniny termin zachoŭvańnia nie bolš za 12 miesiacaŭ.

Zamarozka tolki tarmozić niekatoryja pracesy ŭ praduktach, a nie całkam spyniaje ich.

Tamu miasa (jałavičynu, cialacinu, baraninu, śvininu) rekamiendujecca zachoŭvać pry tempieratury nie vyšejšaj za minus 18-20 hradusaŭ i nie bolš za 6 miesiacaŭ. Posnuju rybu rekamiendavana zachoŭvać da 8 miesiacaŭ, tłustuju — da 4 miesiacaŭ. Pry pavieličeńni terminu zachoŭvańnia hublajucca vitaminy, paharšajecca smak, źniešni vyhlad.

Ci karysnaja «chutkaja ježa», jakaja ŭžo hatovaja paśla razmarozki ŭ mikrachvalevaj piečy

Pradukty dla chutkaha pryhatavańnia ŭ mikrachvaloŭcy, jak praviła, padviarhajucca praciahłaj apracoŭcy i źjaŭlajucca paŭfabrykatam ź vialikim terminam zachoŭvańnia. Jany nie ŭtrymlivajuć patrebnaj kolkaści vitaminaŭ, makra– i mikraelemientaŭ i zvyčajna ŭtrymlivajuć kansiervanty. Tamu pry kupli varta źviartać uvahu na skład, terminy zachoŭvańnia i vytvorcu — čym bolš naturalnych kampanientaŭ i karaciej termin zachoŭvańnia, tym lepš.

Pry ŭžyvańni zamarožanych praduktaŭ treba dakładna prytrymlivacca rekamiendacyj pa zachoŭvańni, vykonvać terminy prydatnaści i praviły razmarozki. Heta dazvolić atrymać maksimum karyści z hetych praduktaŭ i paźbiehnuć prablem z orhanami stravavańnia.

• 9
• 0
• 1
• 0
• 2
• 1
• 3
• 0