Biełaruska zamoviła novy pašpart u pasolstvie Biełarusi ŭ Hiermanii. Jaho zrabili, ale nie addali
Byłoj homielskaj žurnalistcy Irynie Makavieckaj nie vydajuć u biełaruskim pasolstvie zrobleny pašpart. Supracoŭniki pasolstva pierakonvajuć biełarusku atrymlivać dakumient na radzimie. Adnak spačatku jany paviedamili, što novy pašpart u ich. Historyju raskazvaje «Homiel. Štodzień».
Iryna Makavieckaja źjechała ź Biełarusi ŭ Niamieččynu ŭ 2005 hodzie. I raniej takich prablem nie było. Jana rabiła pašparty i sabie, i dzieciam.
Bolš za toje, novy pašpart žurnalistcy zrabili i navat pryznačyli datu, kali možna było jaho zabrać. 11 lipienia Iryna Makavieckaja musiła zabrać pašpart i navat vyjechała ŭ Bierlin pa jaho.
«Na 11 lipienia my damovilisia z pasolstvam, što ja padjedu i zabiaru pašpart. Jany vydajuć dakumienty paśla abiedu. Mnie była pryznačana sustreča na 15:45. U toj dzień było śpiakotna i my vyjechali ź dziećmi zahadzia, kab pryjechać da haračyni. Nam jechać ad doma da Bierlina 575 km.
My prajechali 420 km, to-bok byli ŭžo niedaloka ad Bierlina, kali mnie pazvanili z pasolstva i skazali, što nie zmohuć addać pašpart. Jany patłumačyli heta tym, što pierad tym, jak addavać pašparty, telefanujuć u MUS z pytańniem, ci možna vydać peŭnamu hramadzianinu dakumient», — raspaviała Iryna.
Iryna Makavieckaja napisała skarhu ŭ MZS. Ministerstva zamiežnych spraŭ pieranakiravała skarhu ŭ pasolstva, jakoje napisała na elektronnuju skryniu z prapanovaj novaj daty.
Ale taja data prypadała na pracoŭny dzień Iryny Makavieckaj:
— Ja dvojčy im biezvynikova pisała z prośbaj pryznačyć novuju datu. Paśla hetaha dazvaniłasia ŭ pasolstva, choć heta było i niaprosta, i spytała, kali možna pryjechać pa pašpart.
Ale mnie adkazali, što pašpart možna atrymać tolki ŭ Respublicy Biełaruś. Pryčyny jany nie tłumačyli.
Iryna Makavieckaja adznačaje, što joj tak nichto nie skazaŭ, dzie mienavita znachodzicca dakumient:
— Nie viedaju, jak być zaraz. A raptam na moj pašpart chtości kredyt voźmie ci jašče štości tam.
Kali ja na pracy raspaviała pra situacyju, to moj kaleha z Tunisa skazaŭ, što kali jon prychodzić u svajo pasolstva pa pašpart, to im vydajuć dakumient praz hadzinu. Ja čakała ad biełaruskaha pasolstva pašpart čatyry miesiacy, dyk jašče i nie addajuć.
Kamientary
Navošta joj «pašpart» HUŁAHu?
Mieniaj hramadzianstva, i zabudź hetuju krainu «fail state»
Načať ukrieplať svoj lehalnyj status v Hiermanii.Chorošo by połučiť kako-to podtvierždienije čto jej otkazali v vydačie pasporta.