Čym ciapier zajmajucca braty-tyktokiery, jakich zatrymlivaŭ HUBAZiK
U 2022-m biełaruskija siłaviki zatrymali bratoŭ Biełavusavych — zornych pa biełaruskich mierkach tyktokieraŭ. Prosta ŭ tyktok adnaho ź ich vykłali videa, dzie chłopiec staić na kaleniach. Raskazvajem, jak skłałasia ich žyćcio paśla zatrymańnia.
Starejšaha z bratoŭ Biełavusavych, Uładzisłava, HUBAZiK zatrymaŭ 4 kastryčnika 2022 hoda. 26-hadovy chłopiec na toj čas surjozna zajmaŭsia chakiejem na travie — vystupaŭ za kłub «Minsk» i byŭ forvardam nacyjanalnaj zbornaj. Ale zbolšaha jaho viedali pa tyktoku, dzie ŭ Biełavusava-starejšaha było bolš za dva miljony padpisčykaŭ.
Tudy siłaviki i vykłali videa z chłopcam. Na kadrach spartoviec-tyktokier kazaŭ, što adnym sa svaich rolikaŭ jon byccam by «pakryŭdziŭ ci źniavažyŭ supracoŭnikaŭ milicyi». Spartoviec stajaŭ na kaleniach vidavočna nie pa svajoj voli.
12 kastryčnika siłaviki zatrymali małodšaha z bratoŭ-błohieraŭ, Andreja, jaki taksama byŭ u minułym źviazany sa sportam i ŭvachodziŭ u zbornuju pa chakiei na travie. Adpaviednaje videa «zalili» ŭžo ŭ jahony akaŭnt u tyktoku. Ale 20 kastryčnika abodvuch Biełavusavych vypuścili na volu.
Čym braty zajmalisia z taho času?
Pierš za ŭsio viarnulisia da błohierstva. Na siońnia ŭ akaŭnta Andreja Biełavusava raze_iam dva miljony padpisčykaŭ, u akaŭnta Uładzisłava — 2,3 miljona. Braty aktyŭna zdymajuć novyja videa i niaredka źjaŭlajucca ŭ rolikach adzin adnaho. Voś, naprykład, Biełavusavy na kanale starejšaha z bratoŭ uznaŭlajuć trendavy taniec.
@belousov_10 Kto zdieś prijemnyj
♬ orihinalnyj zvuk - Loša Letučij
A voś taki ž rolik ad małodšaha Biełavusava, Andreja.
@raze_iam Małoj užie nas po rostu dohnał
♬ orihinalnyj zvuk - Ja HLEBAS
Braty-tyktokiery praciahvajuć zdymać videa i pra roznyja žyćciovyja situacyi, asabliva pra adnosiny ź dziaŭčatami. Jany śpiecyjalizujucca na žanry «antypikap» — heta naŭmysna niaŭdałyja sproby flirtu.
@belousov_10 Novyj antipikap užie na youtube: Belousov10
♬ orihinalnyj zvuk - Belousov10
Małodšy Biełavusaŭ, Andrej, pad nikam Raze sprabuje śpiavać i vypuskaje svaje treki. Jon zajmaŭsia hetym jašče da znajomstva ź siłavikami. Letam 2022-ha Raze vypuściŭ sumiesny klip z repieram Dzimam Roŭzam na pieśniu «Usio projdzie» ź niemudrahielistym tekstam. Voś niekalki radkoŭ: «Čuješ, nie hruzisia, braty blizka, uśmichnisia, jana nie vartaja tvaich śloz i bukietaŭ ruž». Videa na hety trek chłopcy zdymali ŭ tym liku na stadyjonie «Dynama».
Ciapier Andrej prasoŭvaje svaju novuju pieśniu «A kazali, nie takaja, fihura jak u Kajli». Brat dapamahaje.
@raze_iam Do konca
♬ orihinalnyj zvuk - Rejz
Jašče Raze nadumaŭsia iści ŭ biełaruski miedyjafutbolny kłub DMedia, i kamanda ŭžo pačała treniroŭki. Nahadajem, što miedyjafutboł — heta spabornictva miž kamandami, dzie viadomyja błohiery i zorki šou-biznesu hulajuć razam z futbalistami-vieteranami. U biełaruskaj kamandzie ź viadomych spartoŭcaŭ budzie, naprykład, Stanisłaŭ Drahun, jaki niekali zabivaŭ łondanskamu «Arsienału», Ihar Šytaŭ, Maksim Žaŭnierčyk i Vital Radzivonaŭ. Što da błohieraŭ, to Andrej nie pieraciahnuŭ siudy brata z chakieja na travie — kampaniju Biełavusavu-małodšamu składuć u tym liku błohiery Badabumčyk (Uład Muzaloŭ, 2,4 miljona padpisčykaŭ u tyktoku) i juny Dania Pod (1,07 miljona padpisčykaŭ u jutubie).
Što da starejšaha z bratoŭ, Uładzisłava, to jon nie tak aktyŭna asvojvaje novaje, jak Raze. Jaho pasty ŭ instahramie — heta zbolšaha stereatypnyja publikacyi pra dziaŭčat, hrošy i znajomstvy. Trochi vybivajecca navina pra toje, što ŭ mai 2023-ha Uładzisłaŭ pakinuŭ chakiejny kłub «Minsk» i skončyŭ takim čynam sa sportam.
A jašče Biełavusaŭ-starejšy maje svaju škołu pa arbitražy trafiku (heta praces zakupu internet-trafiku pa nizkaj canie i jaho nastupny pieraprodaž pa bolš vysokaj canie). Samaje tannaje navučańnie ŭ škole kaštuje 1090 rubloŭ za 30 dzion, paśla jaho na sajcie škoły abiacajuć u pieršy miesiac vyjści na dachod ad dźviuch tysiač dalaraŭ. IP Biełavusaŭ adkryŭ u listapadzie 2022 hoda — praź miesiac paśla historyi z HUBAZiKam.
«Naša Niva» — bastyjon biełaruščyny
PADTRYMAĆ
Ciapier čytajuć
«Biełaruś, što ź internetam? Pracuje praz raz!»: karystalniki A1 skardziacca na prablemy, kampanija prablemu pryznaje1
Kamientary