Raście kolkaść biełarusaŭ, jakija pryjazdžajuć u Litvu. Jany kuplajuć tavary, jakija trapili pad sankcyi, viartajuć PDV
U ciopły čas hoda ŭ Litvu stali čaściej pryjazdžać hramadzianie Biełarusi, paviedamlaje Słužba achovy dziaržmiažy. Pavodle jaje źviestak, rost idzie z červienia, imavierna, jon źviazany z pačatkam siezonu adpačynkaŭ i tym, što praź Litvu lahčej trapić na Zachad, piša Delfi.lt.
Ekśpierty kažuć, što Litva dla biełarusaŭ — zručnaja kraina. Jany pryjazdžajuć siudy pa tavary viadomych brendaŭ i pa tavary, jakija trapili pad sankcyi.
U červieni kolkaść aŭtamabilaŭ ź biełaruskimi numarami vyrasła da 126 000. Pradstaŭnica Słužby achovy dziaržaŭnaj miažy Lina Łaŭrynajcicie-Hryhienie skazała, što rost apošnimi miesiacami tłumačycca tym, što pačaŭsia letni pieryjad adpačynkaŭ.
«U Biełarusi niama mora, akramia taho, na zachad na samalotach biełarusy nie mohuć trapić va ŭsie žadanyja krainy. Tamu, mahčyma, biełarusy jeduć u Litvu i Łatviju ŭ adpačynak abo praz aeraporty hetych krain laciać adpačyvać na zachad», — zaŭvažyła jana.
Zasnavalnik partała Pricer.lt Arunas Vizickas skazaŭ, što susiedzi jeduć u Litvu, bo im heta vyhadna.
«Jany jeduć pa dobra viadomyja brendy, kali kazać pra ałkahol i vopratku, mahčyma, pa elektroniku. Zbolšaha heta źviazana ź mienšymi padatkami, a taksama z uviedzienymi sankcyjami», — zaŭvažyŭ jon.
Jak jašče adnu pryčynu Vizickas nazvaŭ čas adpačynkaŭ i adsutnaść moŭnaha barjera. «Litoŭcy viedajuć ruskuju, biełarusy mohuć damovicca. Čaściej za ŭsio mašyny biełarusaŭ možna ŭbačyć kala handlova-zabaŭlalnych centraŭ, naprykład «Akropalisa», — skazaŭ jon.
Adnak pradstaŭnica Ikea Jolita Judziavičenie skazała, što ŭ adsotkavym vymiareńni biełarusaŭ u hetym handlovym centry byvaje niašmat. «My nie zaŭvažajem rostu», — zaŭvažyła jana.
Pradstaŭnica HC Panorama Birute Kałanavajcie skazała, što biełarusy da ich pryjazdžajuć. «Adnak u nas niama mahčymaści fizična fiksavać danyja pra ich pakupki, častatu pryjezdu», — zaŭvažyła jana.
Adnak, pavodle jaje słoŭ, niekatoryja vysnovy možna zrabić, kali sačyć za vynikami pasłuhi Tax Free (viartańnia PDV pakupnikam z trecich krain). «Kali paraŭnoŭvać z dapandemijnym pieryjadam (2019 h.), sioleta rehistrujecca napałovu mienš viartańniaŭ padatkaŭ, adnak pryjezdžyja traciać bolš. Heta źviazana z rostam cen i inflacyjaj.
Kali sačyć za hetymi źviestkami, ahulnaja karcina pakazvaje, što kolkaść turystaŭ ź Biełarusi źniziłasia, ale moža być i tak, što nie ŭsie jany karystajucca pasłuhaj Tax Free Shopping.
«Turysty z trecich krain mienš traciać u kramach kaśmietyki, parfumieryi, tavaraŭ chatniaha ŭžytku, juvielirnych vyrabaŭ, hadzińnikaŭ i praduktovych kramach», — skazała Kałanavajcie.
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy29
Kamientary