Śpis «kandydataŭ» na źniščeńnie ŭkrainskim śpiecnazam uznačalvaje Uładzimir Pucin. Pra heta ŭ intervju niamieckamu vydańniu Welt zajaviŭ namieśnik načalnika Hałoŭnaha ŭpraŭleńnia raźviedki Minabarony Ukrainy Vadzim Skibicki, paviedamlaje «Ukrinfarm».
«Jon [Pucin] zaŭvažaje, što my da jaho nabližajemsia, ale, moža być, jon baicca, kab jaho nie zabili i svaje… Jon tolki ciapier pačynaje vysoŭvać hałavu, i kali jon heta zrobić, my nie ŭpeŭnienyja, što heta sapraŭdy jon», — skazaŭ hienierał HUR.
Na pytańnie, ci staić HUR za napadami na rasijskich prapahandystaŭ, Skibicki adznačyŭ, što heta nie samyja važnyja celi, i vykazaŭ zdahadku, što rasijanie ŭžo vajujuć pamiž saboj, zmahajucca za ŭładu.
«Naša pieršačarhovaja zadača — źniščyć kamandzira padraździaleńnia, jaki addaje kamandu atakavać», — udakładniŭ hienierał.
Jon zapeŭniŭ, što ŭkrainskaja raźviedka ŭvažliva sočyć za ŭsimi pieramiaščeńniami, kamandnymi centrami i pazicyjami na pieradavoj.
U pryvatnaści, paviedamiŭ Skibicki, ukrainskaja vyviedka sprabuje likvidavać lidara vahnieraŭcaŭ Jaŭhiena Pryhožyna.
Adnak u rešcie rešt, miarkuje raźviedčyk, adkazać za svaje dziejańni daviadziecca ŭsim, chto maje dačynieńnie da ahresii, ci heta palavy kamandzir, ci rasijskija kamandziry, ci važnyja biznesmieny, jakija finansujuć abo vyrablajuć zbroju.
«Ich likvidacyja vyratavała b žyćci mnohich mirnych žycharoŭ… Zhodna ź mižnarodnymi kanviencyjami, jany źjaŭlajucca zakonnaj mišeńniu», — skazaŭ jon.
Skibicki paćvierdziŭ, što ataki na abjekty krytyčnaj infrastruktury na terytoryi Rasii — sprava ruk roznych ukrainskich viedamstvaŭ.
«Usie pastaŭki iduć z Rastova abo praz Krym. Jany zaŭsiody prachodziać pa hetych dźviuch mahistralach, i rasijanie dakładna viedajuć, nakolki važnyja rehijony vakoł Zaparožža i Chiersona. Taksama jak maha chutčej adnaŭlajecca maryupalski port, jaki stanie trecim klučavym punktam dla łahistyki… Važna źnieści abjekty infrastruktury, kab nie dać im (vojskam RF — red.) zadziejničać łahistyčnyja łancužki», — skazaŭ jon.
Što tyčycca samoha Kryma, to, pa słovach Skibickaha, tam nie tak šmat krytyčnaj infrastruktury. Pavodle jaho, jość tam i partyzany, jakija «całkam zdolnyja ŭdaryć», i pradstaŭniki raźviedki «taksama jość».
Krymski most, adznačyŭ Skibicki, dahetul staić, tamu što Ukraina choča dać rasijanam mahčymaść uciačy z paŭvostrava.
Ciapier čytajuć
U jakoj raźviedki była najlepšaja infarmacyja ź Biełarusi ŭ lutym 2022 i chto paviedamiŭ Budanavu, što asnoŭny ŭdar rasijan budzie na Hastomiel. Źjaviłasia vialikaja publikacyja1919
Kamientary