Eks-upaŭnavažany pa pravach dziaciej va Ukrainie: Nieabchodna rasśledavać udzieł Biełarusi ŭ departacyi ŭkrainskich dziaciej
Luboje pieramiaščeńnie ŭkrainskich dziaciej na terytoryju inšaj krainy z akupavanych terytoryj Ukrainy — heta vajskovaje złačynstva. Za heta Łukašenku i inšym datyčnym moža być vypisany ordar na aryšt. Ab hetym u efiry «Biełsatu» zajaviŭ dyrektar fondu «Spasiemo Ukrajinu», eks-upaŭnavažany prezidenta Ukrainy pa pravach dziaciej Mikoła Kuleba.
Były ŭpaŭnavažany prezidenta Ukrainy pa pravach dziaciej, dyrektar fondu «Spasiemo Ukrajinu» Mikoła Kuleba 10 krasavika ŭ efiry «Biełsatu» prakamientavaŭ fakty prymusovaj departacyi dziaciej z akupavanaj častki Ukrainy ŭ Biełaruś, jakija raniej abnarodavaŭ kiraŭnik NAU Pavieł Łatuška.
Pavodle Kuleby, lubyja pieramiaščeńni dziaciej z akupavanych terytoryj Ukrainy na terytoryju inšaj krainy — heta «departacyja i vajskovaje złačynstva».
Što tyčycca źviestak ab pieramiaščeńni ŭkrainskich dziaciej u Biełaruś, to Mikoła Kuleba adznačyŭ, što na siońnia va ŭkrainskaha boku niama adpaviednym čynam zadakumientavanych faktaŭ i treba pravodzić rasśledavańnie. Kuleba zaklikaŭ biełarusaŭ dapamahčy ŭ hetaj spravie i pieradać Ukrainie fakty, jakija ŭ ich jość.
Eks-upaŭnavažany prezidenta Ukrainy pa pravach dziaciej nahadaŭ, što ŭ historyi z prezidentam Rasii Uładzimiram Pucinym i rasijskaj upaŭnavažanaj pa pravach dziciaci Maryi Lvovaj-Białovaj rasśledavańnie było praviedzienaje adpaviednym čynam i mižnarodny sud pryznaŭ sabranyja fakty słušnymi, paśla čaho na Pucina i Lvovu-Białovu byli vydadzienyja mižnarodnyja ordary na aryšt.
Pavodle Kuleby, takoje ž rasśledavańnie pavinna być praviedzienaje i pa zajaŭlenych faktach vyvazu dziaciej u Biełaruś. Kali fakty buduć sabranyja, to vielmi imavierna, što ordary na aryšt mohuć być vydadzienyja i na Alaksandra Łukašenku, i na inšych datyčnych da hetaha asobaŭ.
Surazmoŭca «Biełsatu» padkreśliŭ, što ŭ spravie ŭstanaŭleńnia faktaŭ i vyśviatleńnia, kolki ž mienavita dziaciej vyvozilisia ŭ Biełaruś z akupavanych terytoryj Ukrainy, jość šmat składanaściaŭ. Kali deakupavali terytoryi, to vyśvietlili, kolki dziaciej niama doma, i što ich vyvieźli ŭ Rasiju i nie viarnuli. U vypadku Biełarusi, dzieci, chutčej za ŭsio, zjeździli i viarnulisia.
Adnak, jak ličyć Kuleba, i hety vyvaz byŭ vajennym złačynstvam u dačynieńni da hetych dziaciej i ich siemjaŭ. Tamu ŭsie fakty pavinny być abaviazkova ŭstanoŭlenyja.
9 krasavika kiraŭnik NAU Pavieł Łatuška ŭ efiry «Biełsata» raspavioŭ pra toje, što sabraŭ fakty prymusovaj departacyi dziaciej z akupavanaj častki Ukrainy ŭ Biełaruś. Aficyjnyja čynoŭniki kažuć, što heta dobraachvotnaje pieramiaščeńnie dziaciej nibyta na lačeńnie. Ale, na dumku palityka, nasamreč, heta złačynstva režymu Łukašenki suprać čałaviečnaści.
Łatuška raskazaŭ, što NAU maje namier u chutkim časie pieradać u Mižnarodny kryminalny sud u Haazie dakumienty i paćvierdžańni faktaŭ departacyi dziaciej z Ukrainy ŭ Biełaruś.
Pavodle źviestak, što jość u jaho rasparadžeńni, kala 1050 dziaciej z Danbasu praz fond Tałaja pry padtrymcy «Biełaruśkaliju» było pieravieziena ŭ Biełaruś z akupavanych terytoryj Ukrainy. Viadoma, što dzieci znachodzilisia ŭ Homielskaj i Minskaj abłaściach.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro16
Kamientary