Stała viadoma, chto rychtavaŭ płan pahłynańnia Biełarusi Rasijaj
Płan pa pahłynańni Biełarusi Rasijaj da 2030 hoda rychtavali va Upraŭleńni prezidenta RF pa pryhraničnym supracoŭnictvie. U jaho raspracoŭcy taksama brali ŭdzieł supracoŭniki HRU, Hienštaba US RF, Słužby zamiežnaj raźviedki i 5-j słužby FSB, paviedamlaje centr «Daśje».
Krainami blizkaha zamiežža ŭ jeŭrapiejskim kirunku zajmajecca śpiecyjalny adździeł Administracyi prezidenta — Upraŭleńnie prezidenta pa pryhraničnym supracoŭnictvie. Jano ŭmiešvajecca ŭ palityku Biełarusi, Małdovy i krain Bałtyi. Kuryruje viedamstva Dźmitryj Kozak.
Kiruje Upraŭleńniem prezidenta RF pa pryhraničnym supracoŭnictvie Alaksiej Fiłataŭ. Raniej jon pradstaŭlaŭ intaresy Kramla ŭ Paŭdniovaj Asiecii i Abchazii, a jašče kuryravaŭ humanitarnaje i palityčnaje ŭzajemadziejańnie z «DNR» i «ŁNR».
Stvaryć stratehiju pa pahłynańni Biełarusi adździełu Fiłatava daručyli litaralna za niekalki miesiacaŭ da padpisańnia dekreta Sajuznaj dziaržavy, jaki zaćvierdziŭ tyja samyja 28 prahram pa intehracyi. Kančatkovy pradukt byŭ pradstaŭleny Kozaku vosieńniu 2021 hoda. Raspracoŭkaj dakumienta zajmalisia supracoŭniki Upraŭleńnia pa pryhraničnym supracoŭnictvie Siarhiej Malenka i Vadzim Pališčuk. Jany nie prostyja čynoŭniki.
Naprykład, Siarhiej Malenka byŭ davieranaj asobaj Uładzimira Pucina padčas prezidenckich vybaraŭ 2012 hoda, budučy vykanaŭčym dyrektaram Centra sacyjalna-kansiervatyŭnaj palityki ŭ Pryvołžskaj fiederalnaj akruzie. Praz try hady Malenku pryznačyli kiravać adnym z departamientaŭ va Upraŭleńni Administracyi prezidenta pa sacyjalna-ekanamičnym supracoŭnictvie ź dziaržavami — udzielnikami SND, respublikami Abchazija i Paŭdniovaja Asiecija. Paźniej adździeł pieraŭtvorać va Upraŭleńnie pa pryhraničnym supracoŭnictvie. U im jon uznačalvaje Departamient supracoŭnictva pa intehracyjnych prajektach.
Vadzim Pališčuk — staršy daradca Malenki. U 1980-ch jon słužyŭ u dysłakacyi 309-ha Centralnaha radyjopielenhacyjnaha vuzła suviazi HRU, zatym padaŭsia ŭ žurnalistyku i tolki potym — u Administracyju prezidenta.
Jašče adzin stvaralnik stratehii z Administracyi prezidenta — Vadzim Śmirnoŭ. Jon kiruje departamientam va Upraŭleńni prezidenta pa mižrehijanalnych i kulturnych suviaziach z zamiežnymi krainami. Jak stała viadoma z archiva rabočych dakumientaŭ upraŭleńnia, zamiest kulturnych suviaziaŭ jano zajmałasia pa bolšaj častcy viarboŭkaj ahientaŭ u susiednich krainach i ŭmiašańniem u vybary. U pryvatnaści, supracoŭniki ŭpraŭleńnia padtrymlivali prakramloŭskuju apazicyju ŭ Hruzii i prezidenta Małdovy Ihara Dadona. Sam Śmirnoŭ va ŭpraŭleńni kuryravaŭ Prybałtyku.
U raspracoŭcy dakumienta ŭdzielničali i supracoŭniki HRU. U pracu byŭ uciahnuty načalnik biełaruskaha kirunku Andrej Hrešnikaŭ. U 2016 hodzie poŭny ciozka Hrešnikava pracavaŭ pieršym sakratarom pasolstva Rasii ŭ Biełarusi.
Nad prajektam taksama papracavali Hienštab US RF, Słužba źniešniaj raźviedki i 5-ja słužba FSB, jakaja prasłaviłasia apieracyjami pa ŭmiašańni ŭ spravy zamiežnych krain. U SZR biełaruski kirunak kuryruje Uładzimir Kruhlakoŭ, a ŭ FSB — Alaksandr Strelnikaŭ.
Čytajcie taksama:
Rasijskija ŭłady źbirajucca da 2030 hoda dałučyć Biełaruś — ŚMI atrymali dostup da dakumienta Kramla
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama9
Kamientary