Sierabrystaja «Pahonia» ŭ łaŭrovym vianku: Kabiniet zaćvierdziŭ uznaharodu za vyklučnuju addanaść u słužeńni Biełarusi
Abjadnany pierachodny kabiniet Biełarusi budzie ŭručać miedal «Honar i Hodnaść» ad imia biełaruskaha naroda asobam, jakija prajavili vyklučnuju addanaść u słužeńni Biełarusi.
«Miedal «Honar i Hodnaść», jaki my ŭžo vyrabili, — heta miedaljon sierabrystaha koleru z vyjavaj «Pahoni» ŭ łaŭrovym vianku, z nadpisam «Biełaruś pieradusim» na advarotnym baku. Heta adlustroŭvaje honar Ajčyny za čałavieka, jaki vyklučnym čynam prajaviŭ siabie ŭ słužeńni joj», — prakamientavała pradstaŭnica pa nacyjanalnym adradžeńni Alina Koŭšyk.
Hałoŭny elemient siužetu miedala — hierb «Pahonia» ŭ charakternaj izahrafii, jakaja prypisvajecca mastaku Jazepu Drazdoviču.
Łaŭrovy vianok uziaty z najbujniejšaha manietnaha naminału časoŭ VKŁ — załatoha partuhała Žyhimonta Aŭhusta 1562 hoda, jaki vykarystoŭvaŭsia pieravažna ŭ jakaści ŭznaharody za słužbu. Sabranyja razam, jany źviartajuć uvahu na pierajemnaść pamiž VKŁ i Biełaruśsiu, na najaŭnaść u biełarusaŭ svajoj daŭniaj tradycyi ŭznaharod za zasłuhi pierad radzimaj. Nadpis «Biełaruś pieradusim» akcentuje ŭvahu na zasłuhi pierad Biełaruśsiu i jaje narodam.
Błakitny koler stužki miedala padkreślivaje čyściniu nieba nad Biełaruśsiu. Bieła-čyrvona-biełaja ŭstaŭka adsyłaje da koleraŭ biełaruskaha nacyjanalnaha ściaha. Srebrany koler u hieraldycy aznačaje sumlennaść, achviarnaść i bieskaryślivaść.
Miedal raspracoŭvali najlepšyja biełaruskija hieraldysty, historyki, dziejačy kultury, paviedamiła Koŭšyk.
Finansavaŭsia vyrab miedaloŭ za košt dabračynnaha pryvatnaha achviaravańnia, imia achviaradaŭcy my nie nazyvajem pa jaho prośbie.
Vybirać asob, jakija vartyja ŭznaharody, budzie admysłovaja kamisija, skład jakoj zaćvierdziła kiraŭnica Kabinieta Śviatłana Cichanoŭskaja. Užo zusim chutka buduć abvieščany imiony biełarusaŭ, jakija pieršymi atrymajuć hetuju ŭznaharodu. Niekatoryja ź ich, pa mierkavańniach biaśpieki, buduć uznaharodžany niepublična.
Samo ŭznaharodžańnie, zhodna z pastanovaj Kabinieta, musić adbyvacca ŭ vyhladzie ŭračystaj cyrymonii z udziełam kiraŭnicy Kabinieta Śviatłany Cichanoŭskaj, paviedamiła Alina Koŭšyk.
Ciapier čytajuć
Azaronak napisaŭ pra palitemihranta — paśla hetaha brata i baćku taho kinuli za kraty1
Azaronak napisaŭ pra palitemihranta — paśla hetaha brata i baćku taho kinuli za kraty
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie66
Kamientary