Sabor UPC MP abviaściŭ demarš patryjarchu Kiryłu i zajaviŭ pra samastojnaść Carkvy
Sabor Ukrainskaj Pravasłaŭnaj Carkvy Maskoŭskaha patryjarchatu zajaviŭ, što nie zhodny z kiraŭnikom ułasnaj Carkvy patryjarcham Kiryłam u pytańni vajny Rasii z Ukrainaj, piša «Ukrainskaja praŭda».
U rašeńni Sabora havorycca pra heta ćviorda i adnaznačna:
«Vykazvajem niazhodu z pazicyjaj Patryjarcha Maskoŭskaha i ŭsiaje Rusi Kiryła adnosna vajny va Ukrainie».
Akramia taho, u rašeńni Sabora havorycca, što UPC budzie dziejničać jak samastojnaja carkva:
«Sabor pryniaŭ adpaviednyja dapaŭnieńni i źmianieńni ŭ Statut ab kiravańni Ukrainskaj Pravasłaŭnaj Carkvy, jakija śviedčać ab poŭnaj samastojnaści i niezaležnaści».
Siarod takich rašeńniaŭ, u pryvatnaści, na Sabory ŭzdymałasia pytańnie samastojnaha miravareńnia, abmiarkoŭvaŭsia dazvoł jeparchijam samastojna vyrašać pytańni ŭłasnaha žyćcia va ŭmovach vajny, kali ŭzhadnieńnie ź Sinodam niemahčymaje.
Taksama Sabor razvažaŭ ab stvareńni zamiežnych parafij dla ŭkrainskich uciekačoŭ.
Asobna abmiarkoŭvałasia pytańnie abjadnańnia pravasłaŭnych Cerkvaŭ. Sabor paŭtaryŭ pazicyju UPC, jakaja nie pryznaje kananičnaść Pravasłaŭnaj Carkvy Ukrainy. Pa sutnaści, UPC MP asprečyła ideju abjadnańnia na bazie pryznanaj suśvietnym patryjarcham PCU.
Dla taho, kab dyjałoh adbyŭsia, pradstaŭnikam PCU, na dumku UPC MP, nieabchodna:
- spynić siłavyja zachopy chramaŭ i prymusovyja pieravody prychodaŭ Ukrainskaj Pravasłaŭnaj Carkvy.
- uśviadomić, što ich kananičny status, jak jon zafiksavany ŭ «Statucie Pravasłaŭnaj Carkvy Ukrainy», źjaŭlajecca faktyčna nieaŭtakiefalnym i značna sastupaje svabodam i mahčymaściam u realizacyi carkoŭnaj dziejnaści, jakija praduhledžanyja Statutam ab kiravańni Ukrainskaj Pravasłaŭnaj Carkvy.
- vyrašyć pytańnie kananičnaści ijerarchii PCU, bo dla Ukrainskaj Pravasłaŭnaj Carkvy, jak i dla bolšaści Pamiesnych Pravasłaŭnych Cerkvaŭ, źjaŭlajecca całkam vidavočnym, što dla pryznańnia kananičnaści ijerarchii PCU nieabchodna adnaŭleńnie apostalskaj pierajemnaści jepiskapaŭ.
Kamientary