Ukrainski ministr moža nie mieć racyi. Rasijskija žurnalisty znajšli inšaha vajskoŭca, jaki moh zrabić fota na Polaroid u Irpieni
«Važnyje istorii» śćviardžajuć, što na zroblenym na Polaroid fota z kvatery ŭ Irpieni 25-hadovy Pavieł Piłantaŭ z Murmanskaj vobłaści, a nie Mikita Traćciakoŭ, jak śćviardžaŭ ministr ličbavaj transfarmacyi Ukrainy Michaił Fiodaraŭ.
26 maja ŭkrainskija ŚMI paviedamili, što padčas rasijskaj akupacyi Irpienia pad Kijevam rasijski sałdat vyłamaŭ dźviery ŭ kvateru miascovaj žycharki i, vykraŭšy jaje ŭpryhožańni, pakinuŭ pad dyvanom svaju fatahrafiju. Zdymak jon zrabiŭ na znojdzieny ŭ kvatery Polaroid:
«Kali ja ŭbačyła fota, zrazumieła, što sałdat padumaŭ, što jon [aparat] nie pracuje, tamu što fota spačatku čornaje. Jamu treba čas prajavicca», — vykazała zdahadku ŭłaśnica žylla.
Rasijskamu vydańniu «Važnyje istorii» udałosia identyfikavać asobu sałdata na fota. Heta 25-hadovy Pavieł Piłantaŭ, uradženiec horada Kandałakša (Murmanskaja vobłaść). Piłantaŭ spartsmien, zajmaŭsia akademičnym viesłavańniem — jon łaŭreat premii ŭrada Sankt-Pieciarburha «za dasiahnieńnie vysokich spartyŭnych vynikaŭ na aficyjnych mižnarodnych i ŭsierasijskich spartyŭnych spabornictvach».
U apošnija hady Piłantaŭ žyŭ u Pskovie i słužyŭ u 104-m hvardziejskim desantna-šturmavym pałku (vajskovaja čaść 32515). Dysłakavanyja ŭ Pskovie 104-y i 234-y desantna-šturmavyja pałki (v/č 32515 i v/č 74268 adpaviedna) zajmalisia začystkaj Bučy, Irpienia i Hastomiela.
Zapis ab prynaležnaści Paŭła Piłantava da adnaho z hetych padraździaleńniaŭ źmiaščajecca ŭ źlitaj bazie źviestak sudovych prystavaŭ. Jany ŭžo nie pieršy hod sprabujuć spahnać ź Piłantava daŭhi — pa kredytach, za suviaź i inšaje — na sumu bolš za 70 tysiač rubloŭ. Jaho šukajuć prystavy Pskoŭskaj i Naŭharodskaj abłaściej.
Redakcyi «Važnych istorij» udałosia datelefanavacca da Dźmitryja Piłantava, baćki vajskoŭca, ale razmova była karotkaj. «Žurnalist? Pajšoŭ nachier, bla!» — vyłajaŭsia jon i kinuŭ trubku.
Učora pra toje, «što vajskoŭca z «Pałaroidam» identyfikavali, užo zajaŭlaŭ ukrainski ministr ličbavaj transfarmacyi Michaił Fiodaraŭ: «Z dapamohaj štučnaha intelektu nam udałosia identyfikavać hetaha amatara sełfi i znajści jaho staronku ŭ «VKontaktie». Jaho zavuć Mikita Traćciakoŭ, jamu 26 hadoŭ, rodam z Rastova-na-Donie».
Ale, na dumku «Važnych istorij», ministr Fiodaraŭ pamyliŭsia, bo na fota z-pad dyvana ŭsio ž taki nie Mikita Traćciakoŭ. Bo, niahledziačy na vyznačanaje niejrasietkami fizijahnamičnaje padabienstva z pałaroidnym fota, u Traćciakova śvietłyja vočy. Heta bačna na adnym z zachavanych u archivie fota (paśla pamyłkovaha «vykryćcia» Traćciakoŭ vydaliŭ svaju staronku). A na zdymku z «Pałaroida» koler vačej sałdata ciomny, jak i ŭ Piłantava.
Da taho ž vieści sacsietki padčas vajny — heta nie typova dla bajcoŭ, jakija ŭdzielničajuć u «śpiecapieracyi», choć by tamu, što jany padoŭhu zastajucca biez suviazi. Piłantaŭ, naprykład, nie źjaŭlaŭsia ŭ «VKontaktie» z 12 krasavika. A Traćciakoŭ 3 maja dakładna prysutničaŭ na radzimie ŭ Piermskim krai — rabiŭ murał u pamiać pra pamierłaha ad raku siabra i smažyŭ šašłyki.
«Važnyje istorii» datelefanavalisia da siastry Traćciakova Paliny Kazarynavaj. Jana skazała, što jaje brat užo niekalki hadoŭ nie słužyć u vojsku i ŭ hetym hodzie naohuł nie pakidaŭ terytoryi Rasii.
Kamientary