Žychary Stoŭbcaŭ: Vyjaznyja hrupy HUBAZiK i SOBR druhi tydzień teraryzujuć miascovych
Paśla dyviersij na čyhuncy kala Stoŭbcaŭ u hety rajonny centar Minskaj vobłaści prybyli supracoŭniki HUBAZiK. Druhi tydzień jany zatrymlivajuć sa zbrojaj miascovych i bjuć prosta ŭ pastarunku milicyi. Pra heta daviedałasia Radyjo Svaboda adrazu ad niekalkich krynic, jakija žyvuć u rajonnym centry.
«Pačałosia jašče ŭsio da refierendumu. Miascovyja milicyjanty pačali spačatku zatrymlivać ludziej. Prychodzili dadomu z vobšukami ci vyklikali ŭ RUUS. Zabirali telefony pad prymusam i pahrozaj taho, što admova budzie rasceniena jak niepadparadkavańnie i ŭ lubym vypadku čałaviek siadzie na sutki», — raskazvaje adzin ź miascovych.
«Bjuć padčas zatrymańnia, pa darozie ŭ RUUS i ŭ samim pastarunku»
U smartfonach milicyjanty znachodzili padpiski na tak zvanyja ekstremisckija kanały ci navat sami padpisvali na ich ludziej, kab mieć farmalnuju pryčynu dla administracyjnaj spravy, i adpraŭlali ŭ sud. Prysudžali štrafy, a niekatorym sutki.
Paśla refierendumu ŭ rajonie adbylisia dyviersii na čyhuncy. U samaj hučnaj ź ich miascovyja siłaviki padazrajuć žychara Stoŭbcaŭ Siarhieja Hlebku, jaki nibyta padpaliŭ kałody na rejkach. Paviedamlajecca taksama pra paškodžańnie aŭtamatyki kala stancyi Siniava za Stoŭbcami. Paśla hetaha represii suprać miascovych žycharoŭ stali bolš žorstkimi.
«Pryjechaŭ HUBAZiK na dvuch busikach i pačaŭ teraryzavać miascovaje nasielnictva. Naš miascovy «ekstremiscki» kanał piša, što ličba zatrymanych abo asudžanych siahaje prynamsi 35 čałaviek. Z dapamohaj SOBRa, AMAPa jany ŭłomvajucca ŭ damy, pravodziać vobšuki i zatrymlivajuć ludziej, žorstka zatrymlivajuć. Bjuć padčas zatrymańnia, pa darozie ŭ RUUS i ŭ samim pastarunku», — raskazvaje inšy žychar Stoŭbcaŭ.
Heta paćviardžajecca adrazu niekalkimi krynicami. Ale adkryta ludzi bajacca pra heta raskazvać, kab nie mieć jašče bolšych kłopataŭ. Z žurnalistami paciarpiełyja naŭrad ci žadajuć razmaŭlać navat na ŭmovach ananimnaści. Jak śćviardžajuć miascovyja, milicyjanty i prakuratura nijak nie reahujuć na katavańni ŭ RUUS.
«Sudziać navat za padpisku na ŭkrainskich restarataraŭ»
«Sistemy niejkaj u ich niama. Samaja vierahodnaja teoryja — iduć pa śpisie padpisčykaŭ na kanał «Stołbcy Razam». A sudziać navat nie ŭ Stoŭbcach, choć sud pobač ź milicyjaj. Sudy ciapier vyjaznyja. Vidać, dziela taho, kab nie pakazać rodzičam samich zatrymanych, kab tyja nie ŭbačyli ślady pabojaŭ. Sudziać za roznuju łuchtu. Naprykład, navat za padpisku na ŭkrainskich restarataraŭ», — kaža žychar Stoŭbcaŭ.
Paśla vybaraŭ 2020 hoda ŭ Stoŭbcach prachodzili masavyja akcyi pratestu, u jakich udzielničali sotni ludziej. Spačatku miascovyja ŭłady nie zaminali, navat dazvalali ich u centry horada. Staršynia rajvykankama Dzianis Kalasień navat zaprašaŭ delehacyju miascovych apazicyjanieraŭ na sustreču, u jakoj brali ŭdzieł byłyja ŭžo načalnik milicyi i prakuror. Apanientam ułady raili ŭnosić prapanovy pa raźvićci rajona i zaklikali da dyjałohu. Ale ŭžo praź niekalki tydniaŭ pratestoŭcaŭ pačali sudzić, a suprać niekatorych udzielnikaŭ sustrečy ŭ rajvykankamie zaviali kryminalnyja spravy.
Čytajcie taksama:
Z pačatku vajny zatrymali minimum 8 «rejkavych partyzanaŭ». Što viadoma pra «rejkavuju vajnu» ŭ Biełarusi
Ciapier čytajuć
Što ŭjaŭlaje saboj baza danych, jakuju siłaviki nazyvajuć «uzłomam «Novaj Biełarusi»9
Kamientary