Krynicy: Čyža kašmarać, bo ličać, što jon schavaŭ miljardy, jakija treba viarnuć u Biełaruś
1 vieraśnia byŭ źmienieny daŭni ŭkaz Łukašenki ab prefierencyjach čyžoŭskamu «Trajpłu», jaki ciapier maje viarnuć u biudžet atrymanyja 13 hadoŭ tamu ilhoty. Sam Čyž praciahvaje znachodzicca ŭ SIZA. Krynicy «Našaj Nivy» tłumačać, što moža stajać za hetym rašeńniem.
Sens pretenzij palahaje ŭ tym, što ŭłady ličać, nibyta Čyž u svaje najlepšyja kamiercyjnyja hady vyvieŭ ź Biełarusi i schavaŭ za miažoj značnuju sumu hrošaj, jakaja moža pieravyšać miljard dalaraŭ.
Ciapier Čyža zmušajuć viarnuć hetuju sumu, ale dla taho niama jurydyčnych padstavaŭ — aficyjna biznesoviec pavinien viarnuć tolki toje, što jamu naličyli ŭ 2016 hodzie pa pieršaj kryminalnaj spravie za ŭchileńnie ad spłaty padatkaŭ. Heta jon pa hrafiku starajecca pahašać.
Krynicy NN adznačajuć, što spłata pa pieršaj kryminalnaj spravie i dała nahodu mierkavać, što hrošy ŭ biznesoŭca majucca. A źmiena ŭkaza Łukašenki stvaraje jurydyčnyja abhruntavańni dla spahnańnia novych sum.
Razam z tym, u biznes-kołach vykazvajuć sumnievy pra finansavuju paśpiachovaść Juryja Čyža. Niama sumnievaŭ, što ŭ svoj čas jon rasparadžaŭsia miljardami, ale značnaja častka jaho aktyvaŭ ciapier kirujecca inšymi biznesoŭcami. A sam Čyž šosty miesiac znachodzicca ŭ SIZA. Razam ź im byli zatrymanyja kiraŭniki niekalkich kampanij, jakija zastalisia partniorami paśla razhromu jaho impieryi.
Pretenzii ŭ siłavikoŭ uźnikli da top-mieniedžmientu «Kvarckrejdaprama» — pradpryjemstva ŭ Małaryckim rajonie, jakoje zabiaśpiečvała krejdaj biarozaŭski zavod pa vyrabie budmateryjałaŭ (ź biznes-impieryi Čyža). Jość pytańni da kiraŭnikoŭ «Danprada» — pradpryjemstva na Vałožynščynie, jakoje vyrablała śvininu.
Narešcie, pačalisia prablemy ŭ «NaftaChimTrejdynhu» — heta adzin z apošnich biznesaŭ Čyža, jaki praciahvaŭ pracavać. U sietki z 11 zapravak, try ź jakich znachodziacca ŭ Minsku, zabrali licenziju na prodaž paliva.
Jak viadoma «Našaj Nivie», heta sprava pierahukajecca z raniejšaj kryminalnaj spravaj suprać Čyža ŭ 2016-m, kali jaho zatrymlivali pa padazreńni va ŭchileńni ad spłaty padatkaŭ u asabliva bujnym pamiery.
Tady sprava da suda nie dajšła, bo Čyž pryznaŭ vinu i kampiensavaŭ škodu. Ale jak možna mierkavać, rachunak jamu vystavili niemały i raściahnuty ŭ časie. Jon pa siońnia vinny i dziaržavie, i biznes-partnioram, jakija spahaniali ź jaho daŭhi praz sud.
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary