Siońnia ŭ hałoŭny ofis hrupy kampanij «Pacia», jakaja kiruje sietkaj kramaŭ bytavoj techniki i elektroniki «5 elemient», pryjšli pravaachoŭnyja orhany. Pra heta Tut.by paviedamili infarmavanyja krynicy i paćvierdzili ŭ samoj kampanii.
«Z samaha ranku padniaŭsia kipiš u ofisie. Byli maski-šou. Mała chto zrazumieŭ, što adbyvajecca. Siłaviki praciahvajuć znachodzicca ŭ ofisie», — skazała krynica.
«Ničoha ekstraardynarnaha pakul nie adbyvajecca. Nichto nie zatrymany, nijakich abvinavačvańniaŭ nie pradjaŭlena, kanfiskoŭvajucca dakumienty pa niekatorych kontrahientach dla pravierki. Ofis kampanii i ŭsie kramy pracujuć u štatnym režymie», — rastłumačyli ŭ «Pacia».
Atrymać apieratyŭny kamientar u siłavych viedamstvach pakul nie ŭdałosia.
U historyi «Pacia» jość prykłady, kali joj davodziłasia adbivać pretenzii kantralujučych orhanaŭ. U śniežni 2014 hoda Minhandlu prypyniła pracu troch kramaŭ sietki «5 elemient» z-za parušeńniaŭ zakanadaŭstva ab handli. Adna z klučavych pretenzij — niedastatkovaja kolkaść tavaraŭ biełaruskaj vytvorčaści.
Tahačasny pamočnik prezidenta, a siońnia pieršy namieśnik kiraŭnika Administracyi prezidenta Maksim Ryžankoŭ nazvaŭ «niazhrabnymi» dziejańni Minhandlu suprać «5 elemienta». «Usim zaraz ciažka, vy viedajecie, jakaja situacyja. Ale zamiest taho, kab vyrašyć pytańni ŭ režymie dyjałohu, my razmachvali dubinaj», — skazaŭ tady Ryžankoŭ.
«5 elemient» źjaŭlajecca partnioram fiederacyj futboła, tenisa i baskietboła. A adzin z zasnavalnikaŭ rytejlera Andrej Bałabin (№ 68 u top-200 samych paśpiachovych i ŭpłyvovych biznesmienaŭ pa viersii «Ježiednievnika») — namieśnikam Ryžankova ŭ fiederacyi baskietboła. U ciapierašni čas sietka naličvaje bolš za 50 kramaŭ bytavoj techniki i elektroniki. Bałabin niedastupny dla kamientaroŭ.
Kamientary