KDB vystupiŭ z zajavaj pra zatrymańni, maluje vobraz bajevikoŭ

Pa spravie ab masavych biesparadkach zatrymana 26 čałaviek. U asnoŭnym heta aktyvisty arhanizacyi «Bieły lehijon». Praviedziena 29 pieratrusaŭ. Pra heta BIEŁTA paviedamili ŭ Kamitecie dziaržaŭnaj biaśpieki. Prapanujem vašaj uvazie dasłoŭny pierakaz paviedamleńnia.

Pavialičyć

KDB pačaŭ kryminalnuju spravu pa fakcie navučańnia i padrychtoŭki da ŭdziełu ŭ masavych biesparadkach (č. 3 art. 293 KK RB). Zatrymanyja aktyvisty «Biełaha lehijonu» na čale ź Mirasłavam Łazoŭskim, a taksama «Maładoha frontu» na čale sa Źmitrom Daškievičam — usiaho 26 čałaviek. Praviedziena 29 pieratrusaŭ pa miescach ich žycharstva, znachodžańnia i zachoŭvańnia pradmietaŭ i dakumientaŭ. Kanfiskavanyja aŭtamat Kałašnikava, 3 karabiny, 2 pistalety, patrony, hranaty, dubinki, kidalnyja nažy i siakiery, pradmiety i rečyvy dla vyrabu samarobnych vybuchovych pryład, vajennaja forma, broniekamizelki, kaski, miedycynskija aptečki nataŭskaha ŭzoru, roznaja atrybutyka bataljona «Azoŭ», «taktyčnaj hrupy Biełaruś», UNA-UNSO, a taksama dapamohi pa viadzieńni bajavych dziejańniaŭ u horadzie.

Apieratyŭna-śledčyja dziejańni pa kryminalnaj spravie praciahvajucca, u tym liku z metaj ŭstanaŭleńnia i zatrymańnia ŭsich datyčnych da supraćpraŭnaj dziejnaści.

«Pry hetym u vypadku z «Biełym lehijonam» my majem spravu z prafiesijna padrychtavanymi bajevikami uzrostam ad 25 da 43 hadoŭ», — śćviardžaje KDB. Siarod zatrymanych aktyvistaŭ «Biełaha lehijonu» — prafiesijnyja bajeviki, śćviardžajecca.

Śpiecsłužby strašać, što kanfiskavanuju ŭ aktyvistaŭ «Biełaha lehijonu» zbroju płanavałasia vykarystoŭvać padčas vuličnych akcyj 25 sakavika. Lidary «Biełaha lehijonu» ŭ hetych ža metach mieli namier pryciahnuć aktyvistaŭ «Maładoha frontu» na čale z Daškievičam. Płanavałasia taksama prybyćcio bajevikoŭ z Ukrainy. Havorka idzie pra paśladoŭnikaŭ UNA-UNSO, ź jakimi «Bieły lehijon» ciesna supracoŭničaje jašče z 90-ch, a taksama ab inšych asobach, jakija ŭdzielničali ŭ bajavych dziejańniach na ŭschodzie Ukrainy ŭ składzie nacyjanalistyčnych farmavańniaŭ. Ab padtrymańni siabrami «Biełaha lehijonu» kantaktaŭ z nazvanaj katehoryjaj i prychilnaści anałahičnym pohladach śviedčyć kanfiskavanaja padčas pieratrusaŭ adpaviednaja atrybutyka.

Akramia taho, atrymany dadzienyja ab mahčymym udziele ŭ akcyjach pa-ekstremiscku nastrojenych hrup moładzi ź liku zamiežnych hramadzian u metach padtrymki arhanizataraŭ pratestnaha mierapryjemstva ŭ Biełarusi.

Masavyja zatrymańni pa ŭsioj krainie, nahadajem, pačalisia ŭviečary 21 sakavika. Za niekalki hadzin da hetaha Alaksandr Łukašenka zajaviŭ, što ŭ Biełarusi zatrymali bajevikoŭ, jakija rychtavali pravakacyju sa zbrojaj.

Zatrymańni ž uvohule pačalisia 3 sakavika — kali ŭ roznych haradach krainy raspačalisia masavyja vystupy suprać ekanamičnaj palityki ŭładaŭ.

Pravaabaroncy ličać usiu hetuju kampaniju nadumanaj, skiravanaj na zastrašvańnie hramadstva. Jany nazyvajuć abvinavačvańni falšyvymi, a zajavy ab datyčnaści zamiežnych hramadzian — fejkam. A ekśpierty nazvali pakazanuju «skanfiskavanuju» zbroju abo palaŭničaj, abo strajkbolnaj.

• 0
• 0
• 0
• 0
• 0
• 0
• 0
• 0