Pasłańnika ZŠA ŭ Biełarusi Itana Hołdryča vyklikali ŭ MZS u pytańni publikacyi na sajcie CNN
7 lutaha ŭ Ministerstva zamiežnych spraŭ Respubliki Biełaruś byŭ zaprošany časovy pavierany ŭ spravach ZŠA ŭ Biełarusi Itan Hołdryč, jakomu było zajaŭlena ab nieprymalnaści apublikavańnia na sajcie pryvatnaha amierykanskaha telekanała «CNN» artykuła, u jakim zhadvajecca manumient «Mužnaść» u Miemaryjalnym kompleksie «Bresckaja krepaść-hieroj», paviedamlaje sajt MZS.
Da amierykanskaha dypłamata było daviedziena, što abraźlivy charaktar publikacyi vyklikaŭ chvalu abureńnia i nierazumieńnia prostych biełaruskich hramadzian, hramadskich arhanizacyj. U Druhoj suśvietnaj vajnie Biełaruś straciła kožnaha treciaha svajho žychara, i pamiać pra hierojaŭ, jakija zahinuli ŭ baraćbie za svabodu krainy, dla biełarusaŭ śviataja.
Biełaruski bok adznačyŭ fakt prabačeńniaŭ telekanała CNN. Razam z tym I.Hołdryču była pieradadziena nastojlivaja prośba davieści da kiraŭnictva SNN pazicyju biełaruskaha boku ab tym, što zhadka manumienta «Mužnaść» u hetym artykule źjaŭlajecca nieprymalnaj.
Adnačasova ab hetaj pazicyi Ambasada Biełarusi ŭ ZŠA prainfarmuje kiraŭnictva Dziarždepartamienta. Raniej Ambasada Biełarusi ŭ ZŠA taksama nakiravała žorstki list da redaktara telekanała CNN, paviedamlaje sajt MZS.
Nahadajem, što ŭčora sajt SNN prynios vybačeńni biełaruskim čytačam, a siońnia artykuł pra «samyja pačvarnyja pomniki ŭ śviecie» byŭ vydaleny z sajta CNN.
i Apytanka
Kamientary