Сярэдняя зарплата навукоўцаў у Расіі перавышае $1100, і яе плануюць павышаць далей
Сярэдняя заработная плата навуковых работнікаў да 2018 года будзе ў два разы перавышаць сярэдні заробак па эканоміцы канкрэтнага рэгіёна,
заявіў прэзідэнт РФ Уладзімір Пуцін на агульным сходзе Расійскай акадэміі навук.
Паводле яго словаў, сярэдняя заработная плата ў сістэме Акадэміі навук у мінулым годзе склала каля 34 тыс. рублёў (больш за $1100 у эквіваленце). Тым не менш, прэзідэнт РФ лічыць, што такая аплата не адпавядае кваліфікацыі, адказнасці і прафесійным патрабаванням, якія сёння выстаўляюцца да спецыялістаў, занятых у навуковай сферы. Аднак Пуцін адзначыў, што гэта вышэй, чым сярэдняя зарплата па эканоміцы.
«Да 2018 года сярэдняя зарплата навуковых работнікаў павінная не менш чым у два разы перавышаць сярэднюю па эканоміцы канкрэтнага рэгіёна. Такая задача пастаўленая і, безумоўна, будзе вырашацца», — сказаў Пуцін.
Сярэдняя заработная плата беларускіх навукоўцаў, паводле дадзеных Белстата, у сакавіку 2012 г. дасягнула $514 у эквіваленце. Такая істотная розніца ў аплаце працы ўнутры Адзінай эканамічнай прасторы спрыяе адтоку высокакваліфікаваных навуковых кадраў з Беларусі.
Каментары