Выйшаў на свабоду кіраўнік беларускага Ernst&Young Павел Лашчанка
54‑гадовага топавага аўдытара асудзілі за «прычыненне шкоды нацыянальнай бяспецы Беларусі».
У спісе вызваленых пасля візіту амерыканскай дэлегацыі ёсць Павел Лашчанка — кіраўнік беларускай прадстаўніцтва аўдытарскай кампаніі Ernst&Young, якая ўваходзіць у «вялікую чацвёрку».
Без ацэнкі EY у Беларусі не магла прайсці ніводная сур'ёзная ўгода па пакупцы або зліцці бізнэсу. EY быў адным з асноўных лакаматываў і тлумачальнікаў у справе прасоўвання перадавых фінансавых стандартаў і справаздачнасці.
Паўла арыштавалі ў канцы 2024 года ці пачатку 2025 года паводле артыкула 361 Крымінальнага кодэкса — заклікі да дзеянняў, скіраваных на прычыненне шкоды нацыянальнай бяспецы Беларусі. Вядома, што крымінальная справа ўзбуджана за падзеі 2020 года.
Тады, у разгар збіцця грамадзян міліцыяй, за подпісам Лашчанкі выйшаў ліст да кіраўнікоў сілавых і дзяржаўных органаў, у якім ён выказаў сумнеў у агучаных Ярмошынай лічбах, а таксама заклікаў усіх адумацца і вярнуцца да законнасці.
Невядома, які менавіта тэрмін атрымаў Лашчанка, але за кратамі ён прабыў больш за год. Адбываў пакаранне ў калоніі ў Віцебску.
Каментары
[Зрэдагавана]