Беларуска Альбіна Тонкіх выйшла ў фінал 11-га конкурсу оперных спевакоў Concorso Lirico Internazionale di Portofino, які адбыўся ў Італіі 21—27 ліпеня, піша сайт «Беларусь і свет».
У спаборніцтвах удзельнічалі 92 выканаўцы з 50 краін, адабраныя з 200 кандыдатаў. Пасля першага тура і паўфіналу ў фінал прайшлі толькі 10 чалавек.
Тут наша суайчынніца, уладальніца сапрана, выканала два творы.
Першы — арыю Франчэскі «О, не плач, мой Паола» з оперы Рахманінава «Франчэска да Рыміні», другі — арыю Віялеты E Strano! Sempre Libera Degg’io з оперы Вэрдзі «Травіята».
Першую прэмію ў выніку заваявала казашка Айгерыма Алтынбек, другую — паўднёвакарэец Джунхёк Фелікс Парк, трэцюю — расіянка Лізавета Шувалава, чацвёртую — італьянка Лючыя Тумінелі.
Конкурс CLIP, які праходзіць у курортным прыморскім гарадку Партафіна з 2015 года, прызваны падтрымліваць маладых оперных вакалістаў ва ўзросце ад 18 да 32 гадоў.
Яго журы ўзначальвае француз Дамінік Меер, які ў 2010—2020 гадах быў дырэктарам Венскай оперы, а ў 2020—2025 гадах — тэатра оперы і балета «Ла Скала».
Альбіна Тонкіх нарадзілася ў Мінску, скончыла каледж мастацтваў імя Ахрэмчыка і БДАМ.
У 2017 годзе атрымала I прэмію конкурсу юных вакалістаў Kaunas Sonorum у Каўнасе, а ў 2023 годзе — III прэмію конкурсу імя Чайкоўскага ў Санкт-Пецярбургу.
Цяпер чытаюць
Над шэрым кардыналам Нацбанка згусціліся хмары? Затрымалі яго сябра, былога выканаўчага дырэктара Банка развіцця4
Каментары