Журы Беларускай асацыяцыі журналістаў прааналізавала больш за паўсотні журналісцкіх ад 25 аўтараў беларускіх СМІ і назвала найлепшых за 2008 год.
Журы творчага конкурсу ГА «БАЖ» «Вольнае слова» прааналізавала больш за паўсотні журналісцкіх матэрыялаў ад 25 аўтараў беларускіх СМІ і назвала найлепшых за 2008 год.
У намінацыі «Найлепшая аналітычная публікацыя» перамагла рэцэнзія «Камедыя выраджэння» Аляксандра Фядуты на купалаўскую пастаноўку Мікалая Пінігіна «Пінская шляхта» па аднайменным творы В. Дуніна‑Марцінкевіча.
«У «Пінскай шляхце« Пінігін паставіў дыягназ», — піша сп. Фядута.
«Высакародныя рыцары пазвадзіліся да паўп’яных мужыкоў, якія бяруцца за грудкі пры найменшым падазрэньні ў непавазе да сваёй пэрсоны. Вера зьвялася: гандляры ня толькі аселі ў храмах, але і пачалі дыктаваць сьвятарам зьмест казанняў. Нават паэзія зьвялася: на зьмену геніяльнаму «Пану Тадэвушу« прыйшло ўбогае «Вялікае Княства«, якое загадана прызнаваць за паэтычны шэдэўр пад страхам быць абвінавачаным у супрацоўніцтве з расейскімі і нацыянальнымі спэцслужбамі. Трагедыя Адраджэньня пераўтварылася ў Камэдыю Выраджэньня з усімі наступствамі, якія выцякаюць для выраджанага народу. Трагічнымі наступствамі», — ставіць свой дыягназ сп. Фядута.
У намінацыі «Найлепшая публікацыя літаратурна‑мастацкага жанру ў журналістыцы» першае месца ўзяў нарыс «Аднагодак БНР» журналіста Сямёна Печанко.
Герой нарысу Уладзімір Лялькоў распавядае пра свой шматпакутны лёс. Ён сын праведніка свету, «вораг народу», у вайну ён быў дырэктарам гімназіі ў Мар’інай Горцы, за што адседзеў у Інце амаль дзесяць гадоў.
Сярод іншых пераможцаў сёлетняга конкурсу — Глеб Лабадзенка з «Камсамолкі», Руслан Гарбачоў з «Інтэкс-прэсу» (Баранавічы), Вольга Пруднікава з «Народнай волі».
Прыемна, што аўтары НН сярод пераможцаў — другі год запар. За 2007 год Віталь Тарас быў прызнаны аўтарам найлепшае аналітычнае публікацыі, Сямён Печанко — літаратурна-мастацкае, а Зміцер Панкавец — найлепшым дэбютантам.
Прэмія «Вольнае слова» — своеасаблівая Пулітцэрская прэмія беларускай незалежнай журналістыкі.
Каментары