Венгрыя нацыяналізуе клінікі ЭКА: рост насельніцтва — пытанне «стратэгічнай важнасці»
У рамках кампаніі за павышэнне нараджальнасці ўрад Венгрыі часова нацыяналізаваў некалькі клінік, якія спецыялізуюцца на экстракарпаральным апладненні.
Урад Венгрыі ўкладзе мільённыя сумы ў пашырэнне гэтых клінік, паведамляюць вугорскія СМІ. Дэмаграфічная праблема стала прыярытэтам.
«Калі мы хочам, каб нараджалася больш венгерскіх дзяцей, а не імігрантаў, адзінае выйсце — гэта як мага больш выдаткоўваць на падтрымку сям'і», — заявіў Віктар Орбан, кіраўнік урада краіны. Лідар нацыянал-кансерватараў застаецца ва ўладзе ўжо трэці тэрмін запар.
Венгрыя належыць да тых краін Еўропы, дзе дэмаграфічны спад пачаўся яшчэ на заранку 80-х, у адрозненне ад Беларусі, дзе ён рэгіструецца ад 1993 года. Ранейшыя захады не змянілі гэтай тэндэнцыі.
Урад Орбана вызваліў ад падаткаў маці сямей, у якіх больш за чацвёра дзяцей, а таксама стварыў сістэму суперільготнага крэдытавання для сямей з дзецьмі.
Але нацыяналізацыя амаль усіх клінік ЭКА — гэта крок беспрэцэдэнтны.
У дэкрэце аб гэтай меры гаворыцца, што клінікі падлягаюць неадкладнай нацыяналізацыі дзеля «выканання дзейнасці, якая мае стратэгічна важны для нацыі характар». З 1 лютага ўсе працэдуры ЭКА будуць цалкам пакрывацца са сродкаў фонду сацабароны — прычым без абмежавання колькасці разоў.
Іншыя краіны Цэнтральнай Еўропы таксама ўвялі захады з мэтай спыніць адплыў людзей і павялічыць нараджальнасць. Так, эканамічныя поспехі Польшчы дазволілі польскаму ўраду значна павысіць сацыяльныя выплаты. Цяпер кожная польская сям'я атрымлівае 130 даляраў штомесячнай дапамогі для кожнага дзіцяці да 18 гадоў жыцця, такая ж сума ідзе для людзей з абмежаванымі магчымасцямі. Акрамя таго, $75 выплачваюцца кожнаму школьніку штогод напярэдадні 1 верасня, а маладыя людзі плацяць 0% падаходнага падатку да 26 гадоў.
Да таго, і Польшча, і Венгрыя актыўна намагаюцца перацягваць да сябе на жыхарства людзей сваёй нацыянальнасці з дыяспары.
Насельніцтва Беларусі таксама скарацілася прыкладна на мільён чалавек за апошнія 25 гадоў.
Цяпер чытаюць
У віцэ-спікеркі Каардынацыйнай рады Лізаветы Пракопчык сабралася $12 тысяч даўгоў87
Каментары