Міністэрства антыманапольнага рэгулявання і гандлю зацвердзіла павышэнне тарыфаў на транспарціроўку нафты па тэрыторыі Беларусі з 1 верасня на 3,7%.
«Скарачэнне аб'ёмаў транспарціроўкі нафты ў II квартале 2019 года ў сувязі з адмовай яе прыёму нафтаперапрацоўчымі заводамі Польшчы, Германіі, Чэхіі і Венгрыі з-за павышэння канцэнтрацыі арганічных хларыдаў у расійскай нафце прывяло да скарачэння прагнознага аб'ёму выручкі ААТ «Гомельтранснафта Дружба» на 2019 год, што можа прывесці да невыканання неабходных мерапрыемстваў па інвестыцыйнай праграме, накіраваных на забеспячэнне экалагічнай бяспекі і надзейнасці транспартнай сістэмы ААТ», - адзначылі ў МАРГ.
Для частковай кампенсацыі недаатрыманай выручкі ААТ «Гомельтранснафта Дружба» пастановай МАРГ прадугледжана павелічэнне з 1 верасня тарыфаў на транспарціроўку нафты на 3,7 працэнта.
Папярэдні раз тарыфы мяняліся з 1 лютага 2019 года.
Як паведамлялася раней, Беларусь і Расія ў пачатку жніўня ўзгаднілі павышэнне тарыфу на транспарціроўку нафты па беларускай тэрыторыі на 3,7 працэнта з 1 верасня. Акрамя таго, па выніках работы ў 2019 годзе будзе праведзены аналіз сітуацыі з прапампоўкай нафты па беларускай частцы трубаправода і вызначаны памер далейшага змянення тарыфаў.
Каментары