Мікалай Статкевіч расказаў «Нашай Ніве» папярэдні свой план дзеянняў на 3 ліпеня — палітык ужо даўно анансаваў на гэты дзень чарговую акцыю пратэста.
Праўда, Статкевіч пазбягае агучвання падрабязнасцяў — кажа, што з такімі пытаннямі да яго часта звяртаюцца сексоты.
«Які можа быць падрабязны план, калі ўлады ўсяляк супрацьдзейнічаюць і хочуць ведаць усе варыянты? Вось калі б хто расказаў сцэнар дзеянняў улады, тады б і мы расказалі свой, — кажа Статкевіч. — Але адно магу сказаць дакладна: 3 ліпеня, а 14-й гадзіне, Кастрычніцкая плошча. Мы дапускаем, што яна будзе перакрыта, таму збірацца будзем з боку ўніверсама «Цэнтральны» і ГУМа. Калі плошча буддзе загароджана, пашукаем іншае месца для нашай акцыі».
Лейтматыву акцыі не будзе, кажа Статкевіч, таму што тэмаў да абмеркавання назапасілася багата.
«Адбудзецца мітынг, ён будзе прысвечаны і гэтай даце — дню вызвалення Мінска. Гэта трагічная дата, гэта не час бразгаць зброяй. Мы згубілі шмат людзей у той вайне, таму будзе хвіліна маўчання. Але будзем казаць і пра іншае — мы лічым, што краіна пад унутранай акупацыяй, якая пагражае акупацыяй вонкавай. Я хачу прыцягнуць увагу грамадства да многіх праблем, у тым ліку — пытання палітзняволеных. Ну і асноўнае, канечне: уладу — народу!».
Ацэньваць колькасць патэнцыйных удзельнікаў Статкевіч не бярэцца, кажа, што не можа нават на 100% гарантаваць сваю прысутнасць, таму што ўжо здаралася, што яго гвалтоўна ізалявалі напярэдадні пратэстных акцый.
Цяпер чытаюць
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі2
Сілавікі завітваюць да беларусаў, якіх ужо не могуць прыцягнуць па крыміналцы за ўдзел у маршах, з маскі-шоу — для прафілактыкі
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары