Кандыдат у прэзідэнты Таццяна Караткевіч абяцае зрабіць усё, каб «вярнуць прэстыж прафесіі настаўніка і зрабіць нашу адукацыю сучаснай». Аб гэтым яна заявіла падчас свайго другога перадвыбарнага выступлення па канале «Беларусь-1» 24 верасня.
Паводле яе слоў, сучаснай Беларусі патрэбныя кадры з сучаснымі ведамі. «Даступная і якасная адукацыя — аснова нашага дабрабыту і стабільнага развіцця», — падкрэсліла кандыдат у прэзідэнты.
Караткевіч адзначыла, што ў сусветным рэйтынгу паспяховасці ВНУ Беларусь прадстаўлена толькі двума ўніверсітэтамі, у той час як маленькая Літва — чатырма, а Польшча — шасцю, што моладзь атрымлівае адукацыю дзеля корачкі, пры гэтым амаль 70% вышэйшай адукацыі платная. «Для большасці студэнтаў і іх бацькоў кошт навучання загранічны. А што мы атрымліваем узамен? Студэнты смяюцца з падручнікаў з мінулага стагоддзя, састарэлым абсталяваннем. Выходзяць са сваімі дыпломамі, а рынку яны не патрэбныя», — сказала яна.
Рэцэпт выхаду з такой сітуацыі вядомы, лічыць Караткевіч. «Трэба перастаць ізаляваць нашу адукацыю ад сучаснага свету. Новы вопыт і новыя веды немагчымыя без свабоднага валодання замежнымі мовамі. Размеркаванне — гэта годная дзяржаўная гарантыя першага працоўнага месца для маладога спецыяліста, а зусім не паншчына, як сёння», — адзначыла яна.
Караткевіч перакананая, у што дзяржаўных ВНУ ўсе беларускія студэнты павінны вучыцца бясплатна, як гэта зроблена ў Францыі ці Германіі. «Якасная і даступная адукацыя — зусім не падачка грамадзянам ад дзяржавы, а адна з самых выгадных інвестыцый, якія толькі могуць быць. Людзі, якія атрымаюць запатрабаваную прафесію, будуць зарабляць больш, а значыць будзе больш падаткаў і магчымасцяў забяспечыць сацыяльную абарону і развіццё краіны», — падкрэсліла яна.
Яшчэ адной відавочнай сацыяльнай праблемай Караткевіч назвала становішча настаўнікаў і выкладчыкаў, іх «нізкі сацыяльны статус, мізэрныя зарплаты, велізарныя нагрузкі». «Каб настаўнік займаўся вучнямі, яго трэба вызваліць ад масы адміністрацыйных і ідэалагічных задач. Нядзіўна, што маладыя людзі не жадаюць ісці ў гэту прафесію і набор на педагагічныя спецыяльнасці праходзіць без конкурсу. Настаўнік павінен вучыць і атрымліваць за гэта годную зарплату», — заявіла кандыдат у прэзідэнты.
Цяпер чытаюць
Украінская мадэль згуляла з грузінскім бізнэсменам вяселле ў Канах на 5 мільёнаў еўра. Вядучымі былі Яўген Перлін і Максім Галкін6
Каментары