Мікрабіёлагі распрацавалі «супераналіз» крыві за 25 даляраў
Па адной кроплі можна вывучыць усе вірусы, з якімі чалавек сутыкаўся за жыццё.
Група даследчыкаў з Гарварда, ЗША, прадставіла тэхналогію ўніверсальнага аналізу крыві VirScan, распавядае NewScientist са спасылкай на артыкул у часопісе Science.
Сёння ў крыві падчас аналізу можна адшукаць толькі сляды антыцел, што могуць паказаць апошнія заражэнні. VirScan паказвае ўсе вірусы за ўсё жыццё, нават тыя, што «хаваюцца» без сімптомаў.
Для стварэння тэсту навукоўцы сабралі звесткі аб пептыдах тысячы штамаў дзвюх соцень вірусаў, аднавілі ДНК кожнага вірусу, адказнае за выпрацоўку пратэінаў, ды «падключылі» сегменты ДНК бактэрыяфагам — вірусам, што паражаюць толькі бактэрыяльныя клеткі. Увядзенне мадыфікаваных бактэрыяфагаў у кроў дазваляе пабачыць рэакцыю антыцелаў і па ёй выявіць, з якімі вірусамі арганізм сутыкаўся раней.
Затым прааналізавалі кроў 600 чалавек з ЗША, Тайланда, Паўднёвай Афрыкі і Перу. Выявілася, што большасць людзей сутыкаюцца за жыццё з дзясяткам вірусаў, але некаторым «шанцуе» заразіцца і васьмю дзясяткамі.
Методыка параўнальна танная, аналіз будзе каштаваць каля 25 даляраў за пробу, адна лабараторыя зможа апрацаваць сотню проб за тыдзень.
Сёння ўжо існуюць дастаткова надзейныя тэсты на вірусы, але VirScan будзе карысным не толькі для дыягностыкі ўжо вядомых вірусаў, але і ў разуменні паводзін новых вірусаў.
Да таго ж, навукоўцы сцвярджаюць, што кантакт з пэўнымі вірусамі прыводзіць да развіцця не звязаных наўпрост захворванняў праз шмат год — тэст можа выявіць такую сувязь.
Цяпер чытаюць
У міліцэйскім конкурсе прыгажосці перамагла амапаўка, якая ў 2020 годе разганяла пратэсты47
Каментары