Adbyłasia masiravanaja rasijskaja ataka. Pad udaram Kijeŭ, Žytomir, Roŭna, Burštyn, Ciarnopalščyna i Bukavina
Unočy 23 śniežnia Rasija naniesła masavany ŭdar pa Ukrainie. Sotni šachiedaŭ jašče z 00:00 atakavali praktyčna ŭsie rehijony krainy, a bližej da ranku dasiahnuli zachodnich abłaściej i ŭdaryli pa Žytomiry, Roŭnie, dabralisia da Ciarnopalščyny, Bukaviny i Ivana-Frankoŭščyny, piša Bi-bi-si — Ukraina.
Pavodle źviestak manitorynhavych kanałaŭ, kala dziesiaci stratehičnych bambavikoŭ mahli ažyćciavić puski kryłatych rakiet. Taksama adbylisia puski kryłatych rakiet «Kalibr» z mora.
Fiksujucca ŭdary pa Roŭnie, Žytomiry atakujuć šachiedami niekalkimi chvalami.
Kiraŭnik Čarnavickaj vobłaści paviedamlaŭ pra drony nad vobłaściu; pad pahrozaj znachodziłasia Dniastroŭskaja HES.
Paśla 6‑j hadziny ranicy pavietranuju tryvohu abviaścili na Ivana-Frankoŭščynie. Pavodle manitorynhavych kanałaŭ, šmat «šachiedaŭ» laciać na Burštyn, dzie raźmieščanaja važnaja TEC.
Ahułam padčas hetaha ŭdaru čakajuć asablivaj uvahi da enierhietyčnaj infrastruktury Adeskaj vobłaści i ŭsiaho paŭdniovaha rehijona. Sam horad Adesa niekalki dzion znachodziŭsia ŭ poŭnym błekaŭcie.
Amal usiu noč «šachiedy» ablatali Kijeŭ, ale pierad śvitankam pačali atakavać i stalicu Ukrainy. Tam abviaścili pavietranuju tryvohu i pačała pracavać sistema supraćpavietranaj abarony. Pieravažna hetaj nočču šachiedy nanosili ŭdary pa navakolnych haradkach kala Kijeva.
Ułady Sumskaj vobłaści ŭžo paviedamili pra značnyja razbureńni infrastruktury pablizu Šostki i Kanatopa; pačalisia prablemy z elektrazabieśpiačeńniem.
Apošni raz Rasija nanosiła masavany ŭdar pa ŭsich rehijonach Ukrainy 6 śniežnia, kali byli paškodžany abjekty enierhietyki i ŭviedzieny žorstkija hrafiki adklučeńnia elektraenierhii.
Kamientary