Zasnavany biełarusam startap sumiesna ź niamieckaj kampanijaj raspracoŭvaje ŠI-smartfon
Startap Perplexity, adnym z zasnavalnikaŭ jakoha staŭ biełarus Dzianis Jarac, sumiesna ź niamieckim Deutsche Telekom anansavaŭ smartfon na bazie štučnaha intelektu. Padrabiaznaści raspaviadaje devby.
Anons novaj madeli kampanii zrabili na vystavie Mobile World Congress, jakaja adbyvajecca ŭ Barsiełonie. U smartfon Deutsche Telekom budzie ŭbudavany čat-bot Perplexity.
Štučny intelekt zmoža braniravać avijabilety i hateli, pisać mejły, rabić zvanki, stvarać nahadajki i nie tolki, kab ekanomić karystalnikam čas i siły.
Dla Perplexity hety prajekt aznačaje pierachod ad stvareńnia sistem, jakija prosta adkazvajuć na pytańni, da sistem, jakija vykonvajuć karysnyja dziejańni dla karystalnika, adznačyŭ hiendyrektar kampanii Aravind Šrynivas.
U hetym studzieni Perplexity zapuściŭ ŠI-asistenta dla Android. Vierahodna, jon laža ŭ asnovu novaha devajsa.
Perplexity i DT pačali supracoŭnictva ŭ krasaviku 2024 hoda. DT upieršyniu zhadvała pra AI Phone u minułym hodzie. Techničnyja charaktarystyki hadžetu kampanija nie raskryvaje, jak i toje, chto jaho budzie vyrablać i jakaja apieracyjnaja sistema budzie na borcie (miarkujučy pa skrynšotach, heta budzie Android). Padrabiaznaści abiacajuć u druhim paŭhodździ.
Dzianis Jarac — suzasnavalnik Perplexity, jaki naradziŭsia ŭ 1987 hodzie ŭ Homieli i ciapier žyvie ŭ San-Francyska. Vučyŭsia biełarus na fakultecie prykładnoj matematyki i infarmatyki BDU. Student časta ŭdzielničaŭ u alimpijadach, a paśla pracavaŭ u «Jandeksie».
Padčas studenckaha abmienu ŭ Bierkli biełarus paznajomiŭsia z Aravindam Šrynivasam, jaki taksama vyvučaŭ mašynnaje navučańnie i potym pracavaŭ daśledčykam u OpenAI. Jany pasiabravali i ŭ 2022 hodzie vyrašyli syści z najmu, kab stvaryć novy vid pošuku ŭ internecie.
Tak naradziŭsia Perplexity. Trecim suzasnavalnikam startapa staŭ Džoni Cho — kaleha Jaraca pa Quora.
Ciapier čytajuć
Biełarus raptoŭna i biez daj pryčyny źnik u 2006 hodzie, a praz 19 hadoŭ znajšoŭsia ŭ vioscy pad Smalenskam2
Kamientary