88-hadovy papa Francišak nie źnikaje z navin praz mocnaje paharšeńnie zdaroŭja, Vatykan abmiarkoŭvaje imaviernaje adračeńnie. U situacyi niapeŭnaści padvisła i pytańnie z pryznačeńniem biełaruskaha pradstaŭnika pry Śviatym Pasadzie.
Papa Francišak znachodzicca ŭ stałym vieku i pry słabym zdaroŭi. Adračeńnie ci śmierć pantyfika, pa mierkavańni profilnaj italjanskaj presy, źjaŭlajecca spravaj bližejšaha času.
U aficyjnaha Minska ŭ hetyja tydni pavinien być i vuzki prafiesijny intares da spravy — z elemientami nadziei.
Jašče ŭ kancy 2024 hoda stała viadoma, što Vatykan hatovy pryniać pieršaje biełaruskaje pasolstva pry Śviatym Pasadzie. Da taho pasolstva Biełarusi ŭ Vatykanie nie było — z 2002 hoda funkcyju pradstaŭnika ŭ Vatykanie pa sumiaščalnictvie vykonvaŭ Siarhiej Alejnik.
I choć užo pačałasia viasna 2025-ha, proźvišča budučaha pasła jašče nie nazvanaje.
Pasada pasła ŭ Vatykanie sama pa sabie značnaja dla aficyjnaha Minska. Vatykan, u adroźnieńnie ad inšych zachodnich stalic, histaryčna nie curajecca aŭtakratyj, navat samych kryvavych. Sprabuje ich zrazumieć i vystupić pasiarednickim kanałam kamunikacyi sa stalicami, jakija nie razmaŭlajuć z režymami naŭprost.
Tamu ŭ Vatykan mohuć adpravić čałavieka, jaki źjaŭlajecca fihuraj u sistemie łukašenkaŭskaj dypłamatyi.
Małaimavierna, što heta moh by być niechta z načalnikaŭ upraŭleńniaŭ u MZS. Ale heta moh by być niechta z namieśnikaŭ ministra zamiežnych spraŭ. Ciapier ich čatyry: Siarhiej Łukaševič, Juryj Ambrazievič, Jaŭhien Šastakoŭ i Pavieł Uciupin.
Łukaševiču i Uciupinu rana źjazdžać — jany niadaŭna pryznačany, u kastryčniku 2024 i lutym 2025 adpaviedna.
Šastakoŭ užo pracavaŭ pasłom u Italii, jaho pryznačeńnie małaimaviernaje. Były pasoł u Vatykanie pa sumiaščalnictvie Siarhiej Alejnik ciapier pracuje ŭ parłamiencie i taksama nie moža być razhledžany jak kandydat.
Pa mietadzie vyklučeńnia zastajecca adna asnoŭnaja kandydatura — pieršy namieśnik ministra Juryj Ambrazievič.
Čytajcie taksama: Centralnuju rolu ŭ arhanizacyi pieramovaŭ z amierykancami adyhraŭ muž Natalli Piatkievič. Čamu jon?
Na karyść kandydatury Juryja Ambrazieviča taksama kaža toj fakt, što mienavita jon apošnija hady vystupaje na sumiesnych z pradstaŭnikami Vatykana mierapryjemstvach u Biełarusi, što namiakaje na jahony profil.
Juryj Ambrazievič naradziŭsia ŭ 1975 hodzie ŭ Minsku. U 1997 hodzie skončyŭ z adznakaj jurydyčny fakultet Biełaruskaha dziaržaŭnaha ŭniviersiteta. Na dypłamatyčnaj słužbie z 1997 hoda, pracavaŭ u dahavorna-pravavym upraŭleńni MZS Biełarusi. Pracavaŭ u pasolstvach Biełarusi ŭ Bielhii i Luksiemburhu, pradstaŭnictvach Biełarusi pry NATA i ES. U 2012 hodzie byŭ pryznačany načalnikam hałoŭnaha ŭpraŭleńnia šmatbakovaj dypłamatyi MZS Biełarusi. U 2015 hodzie staŭ Pastajannym pradstaŭnikom pry adździaleńni Arhanizacyi Abjadnanych Nacyj i inšych mižnarodnych arhanizacyjach u Ženievie. 10 lutaha 2022 hoda pryznačany namieśnikam ministra zamiežnych spraŭ.
«Naša Niva» — bastyjon biełaruščyny
PADTRYMAĆCiapier čytajuć
Stali viadomyja novyja detali ŭ maštabnaj spravie arhanizataraŭ kancertaŭ4
Kamientary