Dzie znachodziacca krainy z samym maładym nasielnictvam?

Źviestki ab siarednim miedyjannym uzroście nasielnictva pryvodzić  CIA World Factbook (Suśvietnaja kniha faktaŭ — daviednik, jaki składajecca i rehularna abnaŭlajecca CRU dla patreb uradu ZŠA).

Takim čynam, samym maładym kantynientam źjaŭlajecca Afryka. Tam znachodzicca 21 kraina z samym nizkim miedyjannym uzrostam nasielnictva. Na inšym kancy śpisu — Jeŭropa.

Samaj maładoj krainaj źjaŭlajecca Nihier, dzie miedyjanny ŭzrost nasielnictva składaje 15,2 hoda. Jašče ŭ siami krainach Afryki pałova nasielnictva maje da 18 hadoŭ. Heta Uhanda (16,2 hoda), Anhoła (16,3), Mali (16,4), Čad (16,7), Demakratyčnaja Respublika Konha (16,9), Bienin (17,2) i Mazambik (17,3).

Kali zirnuć za miežy Afryki, to samaj maładoj źjaŭlajecca Palestyna. Tak, u siektary Haza pałova nasielnictva maje mienš za 19,5 hoda, na Zachodnim Bierazie — 21,9. Dalej idzie Afhanistan (20 hadoŭ), Uschodni Tymor (20,7) i Papua-Novaja Hvinieja (21,7).

U Jeŭropie samy małady siaredni ŭzrost nasielnictva (32 hady) maje Kosava. Paśla iduć Ałbanija (36 hadoŭ) i Isłandyja (38). Samym starym u śviecie źjaŭlajecca Kniastva Manaka. Tam siaredni ŭzrost nasielnictva siahaje 57 hadoŭ (56,9).

Pavialičyć

Roznyja prablemy starych i maładych krain

Jak adznačaje Statista, u toj čas, jak samyja staryja krainy śvietu, u tym liku Japonija, Italija, Ispanija i Hiermanija, dzie siaredni ŭzrost nasielnictva składaje ad 47 da 50 hadoŭ, šukajuć šlachi vyrašeńnia demahrafičnaj prablemy, jakaja pahražaje ekanamičnamu rostu, u vielmi maładych krain Afryki supraćlehłaja prablema — ich ekanomiki, instytuty i adukacyjnyja ŭstanovy nie ŭ stanie achapić kłopatam vialikuju kolkaść dziaciej i maładych ludziej, jakija tam pražyvajuć.

Suśvietny bank prahnazuje, što vysokaja naradžalnaść u biednych krainach pahoršyć stan zdaroŭja ich žycharoŭ, skarocić inviestycyi ŭ čałaviečy kapitał i zamarudzić ekanamičny rost.

U Nihiery vialikuju prablemu stvarajuć biednaść i dziciačyja šluby. Kraina pracuje nad skaračeńniem dziciačych šlubaŭ i naradžalnaści, jakaja ŭ krainie i rehijonie tradycyjna asacyjujecca z šancam na bolš bahataje žyćcio.

Jak vyhladaje Biełaruś 

U Biełarusi, adpaviedna CIA World Factbook, siaredni miedyjanny ŭzrost nasielnictva składaje 42,1 hoda. Pry hetym pałova mužčyn krainy majuć mienš za 39,5 hoda, a žančyn — mienš za 45 hadoŭ.

Pa hetym pakazčyku Biełaruś znachodzicca na 184 miescy z 229. Pierad joju takija krainy, jak Bielhija (42 hady) i Rasija (41,9). Horš situacyja vyhladaje ŭ Danii i Niderłandach, dzie siaredni miedyjanny ŭzrost składaje 42,2 hoda.

Polšča zajmaje ŭ rejtynhu 192 pazicyju z pakazčykam u 42,9 hoda. Ukraina znachodzicca na 205 miescy ź siarednim miedyjannym uzrostam nasielnictva ŭ 44,9 hoda, Litva — na 212 (45,1), Łatvija — na 213 (45,5).

• 9
• 0
• 2
• 4
• 4
• 4
• 0
• 0