Byłomu dyleru Bosch u Minsku zabaranili vykarystoŭvać łahatyp kampanii i dali štraf za jaho ŭžyvańnie
Jak stała viadoma rasijskamu telehram-kanału Mash, kampanija Bosch pačała rassyłać uładalnikam svajoj franšyzy ŭ Biełarusi i Rasii patrabavańni pazbavicca ad firmovych łahatypaŭ i zapłacić niaŭstojku za ich užyvańnie.
Mash apublikavaŭ u jakaści dokazu videa sa skarhaj ad adnaho z uładalnikaŭ franšyzy Bosch u Biełarusi.
Na videa 35-hadovy pradprymalnik ź Minska i ŭładalnik dyzielnaha centra Bosch «Servis dyzielnych sistem» (Minsk, vuł. Mahiloŭskaja, 33) Jaŭhien Lichtarovič raskazvaje, što kampanija Bosch vysłała jamu aficyjny list z patrabavańniem pazbavicca ad usich jaje šyldaŭ i łahatypaŭ.
Akramia taho, pradprymalniku vynieśli štraf za vykarystańnie firmovych znakaŭ kampanii ŭ pamiery 100 tysiač rubloŭ (u videa mužčyna nie ŭdakładniaje, jakich mienavita rubloŭ — biełaruskich ci rasijskich).
«Dniami naš dyzielny centr atrymaŭ list ad kampanii Bosch ź iskavymi patrabavańniami demantavać firmovyja šyldy i łahatypy, a taksama kampiensavać niaŭstojku za ich užyvańnie na sumu 100 tysiač rubloŭ. Chaču adznačyć, što ŭsie hetyja šyldy i łahatypy, jak i darahoje abstalavańnie, byli zroblenyja i nabytyja za naš ułasny košt. I hetyja vydatki nijak nie byli nam kampiensavanyja samoj kampanijaj», — skardzicca biełaruski pradprymalnik u videa.
Jak piša Mash, takija ž skarhi prychodziać i byłym dyleram u Rasii: u Kalininhradzie, Barnaule, Kazani i mnohich inšych haradach.
Niamiecki kancern Bosch — adzin z najbujniejšych vytvorcaŭ i pastaŭščykoŭ pramysłovych, bytavych i aŭtamabilnych tavaraŭ u śviecie. Paśla pačatku rasijskaha vajennaha ŭvarvańnia va Ukrainu Bosch spyniŭ svaje pastaŭki ŭ Biełaruś i Rasiju, a taksama razarvaŭ kantrakty sa svaimi dylerami ŭ hetych krainach.
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary