Stvaralniki navihatara pa biełaruskich aŭdyjaknihach Audiobooks.by raskazali «Našaj Nivie», jakija tvory, zapisanyja ichniaj kamandaj, karystajucca najbolšaj papularnaściu siarod słuchačoŭ.
Na sajcie jość aŭdyjaknihi pa tvorach kłasikaŭ, sučasnych aŭtaraŭ, a taksama aŭdyjaknihi dla dziaciej. Siarod knih, ahučanych samim prajektam, pa prasłuchoŭvańni ź vialikim adryvam lidzirujuć dźvie.
Pieršaje miesca, što było čakana, zajmaje papularny tvor Uładzimira Karatkieviča — pryhodnickaja apovieść «Dzikaje palavańnie karala Stacha».
Hałoŭny hieroj vypadkova stanovicca śviedkam złaviesnaha pryvidu dzikaha palavańnia z dalokaha minułaha, jaki trymaje ŭ strachu ludziej.
Apovieść, ahučanaja kupałaŭcam Aleham Harbuzam, dastupnaja biaspłatna.
Za im śledam idzie «Apošniaja kniha pana A.» Alhierda Bachareviča. Jana składajecca z 30 kazak, jakija raspaviadaje kupcu-vydaŭcu piśmieńnik, što trapiŭ u doŭh. Kniha była vydadziena ŭ revalucyjnym 2020 hodzie i ŭžo sioleta ŭniesiena režymam Łukašenki ŭ śpis ekstremisckich materyjałaŭ.
Treciaj pa papularnaści stała kniha «Maja škoła» Hanny Sieviaryniec, u jakoj apovied viadziecca ad imia «rusicy» ź siaredniaj škoły ŭ vydumanym horadzie.
Aŭdyjaknihu ahučyła sama aŭtarka pry padtrymcy biełaruskich supracoŭnikaŭ kampanii Google.
Čaćviortaje miesca niečakana, jak pryznajucca sami stvaralniki sajta, u zbornika apaviadańniaŭ, jaki vydadzieny jašče ŭ 2008 hodzie. Heta «Šlach drobnaj svołačy», u jakoj Jeva Viežnaviec vyvieła halereju nietypovych mocnych hieraiń, jakija sprabujuć vyžyć u krainie «drobnaj svołačy» i hatovyja na vyprabavańni. Mahčyma, u topy kniha padniałasia praź vialiki pośpiech apošniaha vydadzienaha tvora aŭtarki — apovieści «Pa što idzieš, voŭča?».
Na piatym miescy raźmiaściŭsia samy viadomy tvor Miendele Mojchier-Sforyma, jaŭrejskaha aŭtara z Kapyla, — satyryčny raman «Padarožžy Bieńjamina III» u pierakładzie Paŭła Kaściukieviča. Raman, vydadzieny jašče ŭ 1878 hodzie, raspaviadaje pra žycharoŭ biełaruskaha miastečka, jakija vypravilisia ŭ fantastyčnyja krainy Uschodu.
Zaviaršaje padborku najbolš papularnych biełaruskich aŭdyjaknih apovieść «Tancy nad horadam» Uładzimira Arłova, za jakuju aŭtar atrymaŭ Litaraturnuju premiju Ježy Hiedrojcia. Hieroi apovieści — samnambuły, jakija ŭdzień nie znajomyja pamiž saboj, a ŭnačy ŭtvarajuć tajemnaje bractva.
«Padarožžy Bieńjamina III» i «Tancy nad horadam» taksama dastupnyja dla prasłuchoŭvańnia biaspłatna.
A voś z płatnymi knihami skłałasia dziŭnaja situacyja: Biełaruś u hetym śpisie zajmaje tolki šostaje miesca, sastupajučy pa prodažy biełaruskich aŭdyjaknih Polščy, ZŠA i navat Rasii.
Heta tłumačycca ŭ pieršuju čarhu niedastupnaściu ŭ krainie takich šyrokaviadomych płatnych servisaŭ, jak Google Play Books, Spotify, Apple. Siońnia ź Biełarusi knihi možna nabyvać tolki praz adzin servis — Kobo, ale, pa-pieršaje, nie kožny zachoča stavić jašče adnu lišniuju prahramu na telefon, a pa-druhoje, płacić za niekatoryja tvory, pryznanyja ekstremisckimi, paprostu niebiaśpiečna. Da taho ž u pačatku hetaha hoda Ministerstva infarmacyi abmiežavała dostup da sajta ź Biełarusi.
Na hety momant na sajcie sabranyja spasyłki na 523 knihi z sajtaŭ «Knižny Voz», «Biełaruskaja palička», «Kamunikat», «Radyjo Svaboda», «Biełaruski PEN-centr», «Mininfarm Respubliki Biełaruś», a taksama va ŭłasnym ahučvańni, tamu kožny zmoža znajści niešta na svoj hust.
«Naša Niva» — bastyjon biełaruščyny
PADTRYMAĆCiapier čytajuć
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał44
Kamientary