Novy partnior ci partniorka dla vas mohuć być sapraŭdnym ščaściem, ale vaš chatni hadavaniec moža prajaŭlać da ich ahresiju i rabić usio mahčymaje, kab pazbavicca ad novych asob u domie.
Davoli časta možna nazirać źjavu, kali chatnija katy na duch nie pieranosiać źjaŭleńnie ŭ vašym žyćci novych partnioraŭ ci partniorak i ŭsialak prajaŭlajuć ahresiju da ich.
Čamu tak adbyvajecca? U pryčynach nazvanych pavodzin i sposabach ź imi spraŭlacca raźbiraŭsia navinavy partał Onet razam ź niekalkimi ekśpiertami pa pracy z žyviołami.
Ekśpierty kažuć, što reakcyja žyvioły na novuju asobu ŭ domie moža być roznaj: niekatoryja katy cikaviacca čałaviekam, inšyja nie źviartajuć nijakaj ŭvahi, ale jość i takija, jakija buduć złavacca i «raŭnavać» svajho haspadara ci haspadyniu. Źjaŭleńnie druhoj asoby moža navat traŭmavać kata, bo vaš hadavaniec baicca stracić uvahu i luboŭ, da jakich pryzvyčaiŭsia.
«Adnak nieviadoma, ci źviazanyja takija pavodziny z reŭnaściu ŭ čałaviečym razumieńni. Moža być, heta prosta naša čałaviečaja interpretacyja», — kaža Lea Šmitc ź Niamieckaha tavarystva abarony žyvioł.
Inšaha mierkavańnia pa hetym pytańni prytrymlivajecca ekśpiertka i dresiroŭščyca Mikaeła Asmus, nazyvajučy takija ahresiŭnyja pavodziny katoŭ prajavaj sapraŭdnaj reŭnaści.
«Heta adbyvajecca, kali jany pazbaŭlajucca peŭnych resursaŭ, takich jak ježa, miesca dla adpačynku ci navat ludzi», — tłumačyć jana.
U takoj situacyi śpiecyjalisty rajać paźbiahać rezkaj reakcyi na kiepskija pavodziny vašaha hadavanca. Heta aznačaje — nie bić, nie apyrskvać vadoj, nie kryčać i nie vykidvać jaho z pakoja. U advarotnym vypadku heta tolki ŭzmocnić strachi vašaha hadavanca, bo kot ci kotka nie zrazumiejuć, čamu ich karajuć, i buduć pavodzić siabie jašče horš.
«Najlepšy varyjant — heta nie pieraškadžać i nie abmiažoŭvać katu čas i «lubimyja rytuały» sa svaim haspadarom — hulni, abdymki i son razam. Kali ŭ novaha partniora ci partniorki niama alerhii na poŭść, tyja pavinny razumieć i tryvać prysutnaść hadavanca ŭ spalni i nie dražnić jaho. U vypadku škodnictva reakcyja nie pavinna być źviazanaja z ahresijaj i krykami. U jakaści alternatyvy novy žychar moža čas ad času davać katu lubimy łasunak, što prymusić žyviolinu asacyjavać jaho z hetym łasunkam», — śćviardžajuć ekśpierty.
Pa ich słovach, kali kot ci kotka z časam pačnuć pavodzić siabie spakajniej, heta moža stać pieršym krokam u palapšeńni ich adnosin ź inšymi ludźmi ŭ domie. Tady vaš partnior ci partniorka mohuć pastupova prystupać da hulniaŭ, ale zachoŭvajučy aściarožnaść i spačatku robiačy heta na adlehłaści (naprykład, z dapamohaj miačyka ci vudy ź piorami).
Ciapier čytajuć
«Mikałaja bili, dzie tolki jaho bačyli». Pra katavańni źniavolenaha anarchista Dziadka raskazała advakatka Mackievič2
Kamientary