Na pačatku sakavika 28-hadovy mužčyna byŭ zatrymany pry sprobie pierasiačy miažu
U pieršych čysłach sakavika u Voranaŭskim rajonie byŭ zatrymany Viktar Załatareŭski, jaki sprabavaŭ vyjechać ź Biełarusi ŭ Litvu, daviedaŭsia Mayday.
Jak atrymałasia vyśvietlić pravaabaroncam, pry ahladzie mabilnaha telefona mužčyny siłaviki vyjavili padpiski na telehram-kanały, pryznanyja ŭładami «ekstremisckimi». Paśla hetaha jaho administracyjna aryštavali pa art. 19.11 KaAP RB (raspaŭsiudžvańnie, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść).
10 sakavika, u dzień mierkavanaha vyzvaleńnia, Załatareŭskamu byli pradjaŭlenyja abvinavačvańni pa kryminalnaj spravie pa art. 361-1 i art. 361-4 KK RB za nibyta rehistracyju ŭ płanie «Pieramoha». Mayday źviazvaje jaho aryšt ź incydentam u Mačuliščach, ale nijakich dokazaŭ na karyść hetaha, aprača prybliznaha supadzieńnia dat, nie pryvodzić.
Na hety momant Viktar Załatareŭski znachodzicca ŭ SIZA horada Hrodna.
Viadoma, što pierad sprobaj vyjezdu z krainy mužčyna, jaki sam pachodzić z Homiela, pracavaŭ u Minsku ŭ adnoj ź dziaržaŭnych arhanizacyj i pražyvaŭ u internacie. Paśla zatrymańnia jon byŭ zvolnieny.
Kamientary