«My pieramožam. Ukraina pieramoža». Śviatłana Cichanoŭskaja źviarnułasia da biełarusaŭ u hadavinu vajny
Lidarka biełaruskaha demakratyčnaha ruchu, staršynia Abjadnanaha pierachodnaha kabinieta Śviatłana Cichanoŭskaja 24 lutaha źviarnułasia da biełarusaŭ z nahody hadaviny pačatku rasijska-ŭkrainskaj vajny. U svaim videazvarocie jana kazała pra toje, jak biełarusy pieražyli hety hod, jak supraćstajali rasijskaj ahresii i dapamahali Ukrainie i jak praciahvajuć adstojvać svaju hodnaść.
«U hety dzień hod tamu pačałasia vajna. Uvieś śviet pračnuŭsia z navinami pra toje, što Rasija ŭvarvałasia na terytoryju Ukrainy. Ukraincy pračnulisia ad hukaŭ siren i vybuchaŭ rakiet, a biełarusy pračnulisia z adkaznaściu, što hetyja rakiety laciać z terytoryi našaj krainy, chacia my suprać hetaj vajny», — skazała Śviatłana Cichanoŭskaja.
«Ja viedaju, što jašče hod tamu da 24 lutaha my dumali: horš być užo nie moža. A zranku daviedalisia — moža.
U dadatak da represij i ŭnutrypalityčnaha kryzisu my ledźvie nie pieratvarylisia ŭ mižnarodnych izhojaŭ. Biełarusy za miažoj pačali sutykacca z prablemami i dyskryminacyjaj. Ludzi ŭ Biełarusi z-za kryzisu trapili pad skaračeńni na pracy, ceny kožny dzień raśli. Chtości byŭ vymušany vyvozić svaje siemji i biznes. Chtości byŭ zvolnieny ci aryštavany za svaju antyvajennuju pazicyju.
My raźvitalisia ź dziasiatkami našych vajaroŭ, jakija baranili hodnaść Biełarusi va Ukrainie: Ilja Chrenaŭ, Alaksiej Skobla, Dźmitry Apanasovič, Dźmitry Rubašeŭski, Kanstancin Dziubajła, Pavieł Susłaŭ, Ivan Marčuk, Vasil Parfiankoŭ, Vasil Hrudovik, Vadzim Šatroŭ, Michaś Šavielski, Alaksiej Vieščavajłaŭ, Alaksiej Aŭdziejenka, Eduard Łobaŭ i inšyja hieroi volnaj Biełarusi.
Napeŭna, heta byŭ adzin z samych ciažkich hadoŭ u našym žyćci. Ale my zdoleli jeho pieraadoleć. Za hety hod my šmat zdabyli, my lepiej daviedalisia adno adnaho, vyśvietlili, što my možam kudy bolš, čym dumali. My zmahli dakazać, što biełarusy — nie režym, jak i nie Rasija. Kožny dzień dapamahali adno adnamu i Ukrainie, zastavalisia spahadlivymi da čužoha bolu, niahledziačy na ŭłasny bol. My jašče raz ubačyli, kolki hierojaŭ siarod nas. Našyja śmiełyja partyzany, jakija ŭ adzinočku spyniali vajskovyja ešałony. Našyja dobraachvotniki. Našyja vałanciory va Ukrainie i Biełarusi. Dziasiatki tysiač ludziej, jakija dasyłali infarmacyju ŭ «Biełaruski hajun». Kožny z vas ryzykavaŭ, kab vyratavać čyjości žyćcio.
Niahledziačy na ŭłasnyja prablemy, vy praciahvajecie padtrymlivać palitviaźniaŭ i ich siemji. Vy ładzicie mitynhi pa ŭsim śviecie, źbirajecie humanitarnuju dapamohu, raspaviadajecie praŭdu pra Biełaruś tym, chto jašče jaje nie viedaje: i svajakam, jakija hladziać televizar, i ŭładam roznych krain».
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary