Ćvil i hnil. Damy, što Bred Pit pabudavaŭ dla biednych, razvalvajucca na vačach
U 2005 hodzie pa šmatlikich amierykanskich štatach prakaciŭsia razburalny ŭrahan «Katryna». Najbolš tady paciarpieŭ štat Łuiziana, dzie šmat ludziej zastałosia biez chat. Bred Pit vyrašyŭ dapamahčy.
Akcior abviaściŭ, što razam sa svaim fondam Make It Right jon pabuduje ŭ Novym Arleanie, hałoŭnym horadzie Łuiziany, 109 damoŭ dla paciarpiełych ad «Katryny». Pit zaprasiŭ na pracu viadomych architektaraŭ i zrabiŭ damy ekałahičnymi i ŭstojlivymi pierad stychijnymi biedstvami. Na prajekt jon vydzialiŭ 5 miljonaŭ dalaraŭ, inšyja zorki — ad repiera Snup Doha da Biła Klintana — taksama pieraličyli hrošy na damy, košt jakich dla žycharoŭ skłaŭ nie bolš za 150 tysiač dalaraŭ, piša Guardian. Pa amierykanskich mierkach, heta niadoraha.
Ale ž nie prajšło i dziesiaci hadoŭ sa zdačy budynkaŭ, jak damy pačali psavacca. Častka ludziej, što jašče žyvuć u ich, padała sudovy isk suprać Pita i jaho fondu. Žychary narakajuć na padtapleńni, ćvil, hniłyja hanki, poručy na leśvicach łamajucca, jość prablemy z vodapravodam, vientylacyjaj i pravodkaj — byli navat pažary. U dadatak da ŭsiaho, u damach zavialisia termity.
Dva damy znachodzilisia ŭ takim drennym stanie, što ich daviałosia źnieści. Z tych budynkaŭ, što zastalisia, tolki šeść damoŭ znachodziacca ŭ davoli dobrym stanie. Jašče šeść budynkaŭ stajać zaniadbanyja, a na ramont šmat u kaho hrošaj niama.
U samym pačatku fond Pita jašče dapamahaŭ miascovym žycharam z kaśmietyčnym ramontam. Ale paźniej arhanizacyja pačała cisnuć na žycharoŭ z patrabavańniem padpisać pahadnieńnie ab nievydavańni infarmacyi pierad tym, jak ludziam narešcie skažuć, što ž nie tak ź ich damami.
U 2018 hodzie častka žycharoŭ padała sudovy pazoŭ suprać Pita i jaho fondu. Viadoma, što niekatoryja z žycharoŭ addali za damy ŭsie svaje nakapleńni, ale žyć u ich nielha, i za čas, što prajšoŭ z padačy pazovu, stan damoŭ jašče bolš pahoršaŭ.
Fond Pita, u svaju čarhu, padaŭ pazovy ŭ adras prajektavalnikaŭ damoŭ. U 2021 hodzie fond atrymaŭ jašče niekalki pazovaŭ, u tym liku ad miascovaha banka i navat ad kasca hazonaŭ, jakomu niedapłacili tysiačy dalaraŭ zarobku.
Łatuška abviarhaje abvinavačańni ŭ charasmencie ad delehatki KR Karpušonak83
Łatuška abviarhaje abvinavačańni ŭ charasmencie ad delehatki KR Karpušonak
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary