Bolš słabaha ałkaholu i mienš soku. Što ciapier kuplaje biełaruski spažyviec?
Jakich tavaraŭ sioleta biełarusy stali kuplać bolš, a ad čaho vyrašyli ŭstrymacca? I jak na heta paŭpłyvała inflacyja? Thinktanks.by praanalizavaŭ danyja aficyjnaj statystyki pa dynamicy roźničnaha prodažu.
Vydańnie paraŭnała pieryjad sa studzienia pa vierasień 2021-ha z anałahičnym pieryjadam minułaha hoda.
Akazałasia, što samy vialiki skačok adbyŭsia ŭ prodažach słabaałkaholnych napojaŭ (kali nie ličyć piva). A macniej za ŭsio prasieli prodažy fruktovaha soku.
U top rostu prodažaŭ trapili vyklučna charčovyja tavary. A ŭ antyrejtynhu jość i niecharčovyja.
Top-5 tavaraŭ pa roście prodažaŭ:
- napoi słabaałkaholnyja (bieź piva) — 61,7%
- minieralnaja vada — 12%
- kańjak, vino i likiory — 10-15%
- miasnyja pradukty (kaŭbasnyja vyraby, vendžanina, paŭfabrykaty) — 5,1%
- dziciačaje charčavańnie — 5,1%
Top-5 tavaraŭ pa padzieńni prodažaŭ:
- fruktovyja i aharodninnyja soki — -14%
- televizary — -11,5%
- krupy — -10%
- abutak — -10%
- alej — -9%
Za hod — ź vieraśnia minułaha hoda pa vierasień hetaha — bolš za ŭsio padaraželi harodnina: buraki, morkva, kapusta. Ceny na ich vyraśli na 45-67%, adnak prodaž harodniny za hety pieryjad tolki pavialičyŭsia. Sadavina padaražeła paraŭnalna nie vielmi (za vyklučeńniem bananaŭ).
Padaražeŭ na 50% alej, i, jak bačym, kuplać jaho stali mienš. Vyraśli košty na paŭfabrykaty i vyraby ź miasa, što nie prymusiła biełarusaŭ admovicca ad ich. Zatoje nieapracavanaha miasa stali kuplać mienš.
U cełym u 2021 hodzie prodažy charčovych i niecharčovych tavaraŭ vyraśli na 1,7% i 1,3% adpaviedna.
Kamientary