«Płanavali ataki na siłavikoŭ, sudździaŭ, televiadučych» — što raskazali na TB pra siamju Vajciachovičaŭ, jakich vinavaciać u teraryźmie
15 vieraśnia na ŭsich dziaržaŭnych telekanałach vyjšli siužety, pryśviečanyja barysaŭskaj siamji Vajciachovičaŭ. Volhu i Vitala Vajciachovičaŭ, ich syna Ułada z žonkaj Naściaj zatrymali 13 žniŭnia. Ich vinavaciać u kidańni kaktejla Mołatava ŭ dom Aleha Hajdukieviča i padrychtoŭcy da šerahu inšych złačynstvaŭ.
«Naša Niva» ŭžo pisała, što viadoma pra hetuju siamju.
A voś što raskazali na telebačańni.
Vajciachovičy daŭno trapili ŭ pole zroku pravaachoŭnikaŭ, paviedamili ŭ siužecie STB. Uładam zacikavilisia paśla taho, jak jon pastaviŭ GPS-trekier na aŭto milicyjanta. Trekier zaŭvažyli, z taho času Uładam zaniałosia KDB.
Sačyli za siamjoj daŭno: u siužecie navat jość videazdymka, jak siamja źbirajecca na rybałku. Vajciachovičaŭ prasłuchoŭvali, zapisvali ich razmovy.
Paviedamlajecca, što Uład z baćkam płanavali niekalki terarystyčnych atak: na siłavikoŭ, sudździaŭ, televiadučych i Hajdukieviča. Płanavali vykradać, katavać i zapisvać pakajalnyja videa.
Baćka prapanavaŭ synu dapamohu ŭ «pakušeńni» na Hajdukieviča. Vyrašyli zrabić vyhlad, što jeduć usioj siamjoju na rybałku, prajšlisia kala doma Hajdukieviča z małym. Schavali niepadalok butelki z kaktejlami Mołatava.
Paśla ŭnačy baćka kinuŭ butelku. Na videa sam Vital Vajciachovič pryznajecca, što kidaŭ haručuju sumieś.
Pra napad na dom Hajdukieviča siłaviki viedali zahadzia i kantralavali situacyju, kali vieryć siužetu na TB. Ale Vajciachovičaŭ nie zatrymlivali adrazu, kab ustanavić inšych fihurantaŭ spravy.
Paśla Vajciachovičy płanavali ŭzarvać mašynu milicyjanta ŭ Barysavie. Uład Vajciachovič na videa raskazvaje, jak rychtavali kaktejl Mołatava. Taksama jon kaža:
«Płanavali, kab baćka paliŭ mašynu haručaj sumieśsiu z butelki, paśla da drona pryviazać tabletki suchoha haručaha, padpalić ich i kab dron padpaliŭ aŭto».
Da drona, praŭda, sprava nie dajšła. Kali Vital Vajciachovič palivaŭ aŭto haručaj sumieśsiu, jaho z synam zatrymali.
Uład i baćka byli vykanaŭcami złačynstva, Anastasija, žonka Ułada, była apierataram, paviedamlajecca ŭ siužecie. Akramia taho, na aŭdyja Uład abmiarkoŭvaje ź joj niekatoryja płany.
Jakoje dačynieńnie da złačynstvaŭ maje Volha Vajciachovič, ź siužetaŭ nie vielmi zrazumieła.
Ahułam pa spravie zatrymana bolš za 20 čałaviek, rasśledavańnie praciahvajecca, paviedamlaje KDB. Abvinavačanyja supracoŭničajuć sa śledstvam, dajuć pryznalnyja pakazańni. Zaviedzienaja sprava pa artykule 289, akt teraryzmu. Vajciachovičam pahražaje da 15 hadoŭ.
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary