Pradpryjemstva «Raskosmasa» prapracavała vyhlad bijałahičnaha spadarožnika «Viartańnie-MKA», na jakim paśla 2025 hoda płanujecca zapuścić 20 myšej na vyšyniu da 200 tysiač kiłamietraŭ na miesiac, raspavioŭ ria.ru namieśnik dyrektara pa navucy Instytuta miedyka-bijałahičnych prablem RAN Uładzimir Syčoŭ.
Finansavańnie prajekta ažyćciaŭlajecca Fiederalnaj kaśmičnaj prahramaj RF.
Jon paviedamiŭ, što taksama paśla 2025 hoda płanujecca palot treciaha bijaspadarožnika «Bijon-M». «My źbirajemsia adpravić jaho na arbitu vyšynioj na 500 kiłamietraŭ. Nam važna pahladzieć, jak štučnaja siła ciažaru budzie adbivacca na žyviołach, dla čaho na bijaspadarožniku ŭstalujem centryfuhu», — skazaŭ Syčoŭ.
Pavodle jaho słoŭ, na druhim «Bijonie-M», zapusk jakoha adbudziecca ŭ 2023 hodzie, budzie adpracavanaja sistema ŭtrymańnia myšej u intaresach ich palotu na trecim «Bijonie-M».
«Zvyčajna ŭ kaśmičnym palocie my kormim žyvioł pastapadobnym kormam, ź jakim jany atrymlivajuć i vadu. Heta nie padychodzić dla centryfuhi, dzie my budziem vymušanyja trymać žyvioł na ćviordaj ježy i asobna davać vadu», — rastłumačyŭ navukoviec.
U suviazi z hetym, dadaŭ jon, 15 myšej na druhim «Bijonie-M» buduć na ćviordaj ježy, a dla pićcia im buduć davać hieliravanuju vadu.
U 1973-1996 hadach u kosmas byli zapuščanyja 11 spadarožnikaŭ «Bijon», na jakich ažyćciavili paloty 12 małpaŭ. Pieršy spadarožnik «Bijon-M» palacieŭ u krasaviku — mai 2013 hoda z myšami, piasčankami, hiekonami, ślimakami, rakapadobnymi, rybami i roznymi mikraarhanizmami.
Kamientary