Parašenka — Pucinu: Heta nie hramadzianskaja vajna, heta vašy sałdaty, jakija akupavali maju krainu
Pra heta 13 lutaha ŭ chodzie debataŭ padčas kanfierencyi pa biaśpiecy ŭ Miunchienie zajaviŭ prezident Ukrainy Piatro Parašenka, źviartajučysia da prezidenta RF Uładzimira Pucina i kamientujučy zajavu kiraŭnika ŭrada RF Dźmitryja Miadźviedzieva ab «hramadzianskaj vajnie va Ukrainie».
«Heta nie hramadzianskaja vajna, spadar Pucin, heta - vaša ahresija. Heta nie hramadzianskaja vajna ŭ Krymie, heta vašy sałdaty, jakija akupavali maju krainu. I heta nie hramadzianskaja vajna ŭ Siryi - heta vaša bambardziroŭki mirnaha nasielnictva ŭ Siryi», - zajaviŭ Parašenka.
Jon dadaŭ, što heta źjaŭlajecca «demanstracyjaj taho, što my z RF žyviem byccam u roznych, paralelnych realnaściach, suśvietach».
Parašenka padkreśliŭ, što hod tamu byli zaklučanyja Minskija pahadnieńnia, zhodna ź jakimi Ukraina pavinna ŭstalavać kantrol nad svajoj miažoj, jakaja dahetul častkova niepadkantrolnaja praz prarasijskich bajevikoŭ.
«Rasija źjaŭlajecca pahrozaj dla hetych miežaŭ štodnia. Rasijskaja amunicyja, zbroja zachodzić va Ukrainu štodnia. Pa-druhoje - nieabchodna vyvieści ŭsie zamiežnyja vojski z našaj terytoryi», - zajaviŭ Parašenka.
Jon padkreśliŭ, što Ukraina maje dokazy ich prysutnaści — «i heta nie kuča rasijskich pašpartoŭ, jakija ja demanstravaŭ».
«Heta nie prosta šmat paśviedčańniaŭ, heta i spadarožnikavyja fatahrafii, raźviedka, śviedki», — dadaŭ prezident Ukrainy.
Taksama Parašenka padkreśliŭ, što ekanamičnyja sankcyi suprać RF pavinny praciahvacca da taho času, pakul Rasija nie zabiaśpiečyć kantrol Kijeva nad ŭkraina-rasijskaj miažoj na Danbasie, piša Jeŭrapiejskaja praŭda.
«I pakul nie budzie kantrolu nad hetaj miažoj, sankcyi suprać RF pavinny zachoŭvacca», — zaklikaŭ Parašenka.
Jon vykazaŭsia, što ŭ ciapierašni čas RF vykarystoŭvaje ŭsie miery, kab razburyć adzinstva ŭ ES pa pytańni sankcyj.
Kamientary