Biełaruski biarozavik u ZŠA nazyvajuć chitom siezona i pradajuć za $42
Zamiežnaja presa pradrakaje sapraŭdnaje «šalenstva» vakoł biarozaviku, jaki «lečyć mnohija zachvorvańni, hałaŭnyja boli i navat pazbaŭlaje ad celulitu».
Biarozavy sok ź Biełarusi karystajecca vialikim pośpiecham za miažoju, a ŭpakoŭka biarozaviku na internet-placoŭcy Amazon.com kaštuje $41,88.
Zamiežnyja hurmany na chvali prahi da novych praduktaŭ adkryvajuć novyja smaki. U zachodnich krainach jašče da niadaŭniaha času była papularnaja kakosavaja vada, pra jaje pieravahi i karysnyja jakaści nie stamlalisia raspaviadać kinazorki i madeli. Ale navat i na jaje moda prachodzić — prynamsi, hetak śćviardžajuć žurnalisty, jakija pišuć pra zdarovy ład žyćcia.
Brytanski štodziońnik Daily Mail raić i ŭvohule zabyć pra kakosavuju vadu, bo «ŭ 2015-m usie buduć šaleć pa biarozaviku, jaki lečyć zachvorvańni vantrobaŭ, hryp, hałaŭnyja boli i navat pazbaŭlaje ad celulitu».
U vydańni Huffington Post biarozavy sok nazvali klučom da vyrašeńnia «prablem sa zdaroŭjem i pryhažościu» i novym napojem hodu.
Dniami ŭ łondanskaj haziecie London Evening Standard ziaviŭsia jašče adzin artykuł pra biarozavy sok. Adznačajuć, što jon narabiŭ niemałoha šumu siarod takich fihur, jak Hviniet Pełtroŭ. U artykule pišuć, što biarozavy sok zavajoŭvaje palicy Vialikabrytanii, a brend Byarozavik ź Biełarusi, jaki pradajecca na Amazon. com, nazyvajuć i ŭvohule adnym z «najbujniejšych brendaŭ u ZŠA» ŭ svaim siehmiencie.
«Biarozavik» robiać na Minskim zavodzie biezałkaholnych napojaŭ.
«Unikalny dar biełaruskaj pryrody» — hetak jaho reklamujuć vytvorcy.
Kiraŭnik adździeła źniešnieekanamičnaj dziejnaści Michaił Siničenkaŭ raspavioŭ, što ciapier na biełaruski biarozavy sok najbolšy popyt — z boku ZŠA i Aŭstryi. Pra abjomy pastavak Siničenkaŭ kazać nia staŭ, spasłaŭšysia na kamiercyjnuju tajamnicu. Ale kaža, što na najbujniejšaj amerykanskaj internet-placoŭcy Amazon.com biełaruski sok ziaviŭsia jašče dva hady tamu: «U nas byli kantakty z amierykanskaj kampanijaj pa inšych pytańniach. I ŭ pracesie ŭzajemadziejańnia źjaviŭsia intares da našaj pradukcyi. To bok iduć zakupy na amierykanskuju kampaniju, jakaja dalej hetym zajmajecca».
U ZŠA i Aŭstryju staličny zavod ekspartuje hetak zvany «arhanik» — ekalahična čysty pradukt.
Zacikaŭlenaść z boku inšych krain na Minskim zavodzie biezałkaholnych napojaŭ tłumačać popytam, jaki isnuje na Zachadzie na karysnaje i zdarovaje charčavańnie.
Biarozavik pradajuć u Biełarusi dy ekspartujuć u Rasiju. Niadaŭna, jak raspavioŭ Siničenkaŭ, pastavili i ŭ Turkmenistan, dzie hetaksama «jość peŭny intares» da biełaruskaha soku.
«Apranuli» ž biarozavy sok u ciapierašnija pakunki dyzajniery z brendynhavaha ahienctva ŭ Minsku «Folio-Art». Valancin Łatuškin, jaki niepasredna i raspracavaŭ dyzajn, kaža, što ŭpakoŭka źmianiłasia, kali sok trapiŭ na amierykanski rynak: «Dla ich litr — heta šmat. Jany nia pjuć takimi abjomami. Tamu my pierarablali našy litrovyja butelki na paŭlitrovyja.
Usie cikavyja hrafičnyja rašeńni — tyja ž rysački, byccam na stvale biarozy, jakija pierachodziać u štrych-kod, ci božaja karoŭka, — lepš hladzielisia na litrovaj butelcy.
Pavodle Valancina Łatuškina, pośpiech praduktu zaležyć navat nie ad dyzajnu i ŭpakoŭki, a pieradusim ad biełaruskich vytvorcaŭ i toj pracy, jakuju jany ŭkładvajuć u prasoŭvańnie brendu na zamiežny rynak.
Dyzajn «Biarozaviku» ŭ 2011 hodzie zaniaŭ pieršaje miesca ŭ katehoryi «Etykietka i ŭpakoŭka» na fiestyvali biełaruskamoŭnaj rekłamy i kamunikacyi AD.NAK.
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary