17‑hadovuju žycharku Kareličaŭ (Haradzienščyna), šukali ad 3 žniŭnia. U zabojstvie dziaŭčyny padazrajecca 27‑hadovy trojčy asudžany žychar haradzkoha pasiołku.
Kali dziaŭčyna nie viarnułasia damoŭ uviečary (a raniej ź joj takoha nie zdarałasia) maci pazvaniła ŭ milicyju. Pa tryvozie ŭźniali asabisty skład Karelickaha RUUS, vyklikali ekspertaŭ z Horadni, paviedamlaje «Milicejski vieśnik». Pošuki nie davali plonu bolš za tydzień. Śledčyja vyklikali na dopyty ŭsich padazronych asobaŭ. Najpierš cikavilisia tymi, chto raniej adbyŭ termin za zhvałtavańnie, bo pracoŭnaj versijaj źniknieńnia školnicy było mienavita ciažkoje złačynstva seksualnaha charaktaru. Asablivuju cikavaść vyklikaŭ trojčy asudžany miascovy žychar, jaki kolki miesiacaŭ tamu vyzvaliŭsia z turmy, dzie adbyvaŭ pakarańnie za zhvałtavańnie. Małady čałaviek nia mieŭ alibi na toj viečar, a na nastupny dzień niečakana dla svajakoŭ źjechaŭ u Miensk. Najbolšaje padazreńnie vyklikała toje, što nieŭzabavie paśla źniknieńnia dziaŭčyny jon, nibyta, nabyŭ mabilny telefon akurat taki, jak u źnikłaj. Padvioŭ padazravanaha i detektar many. U vyniku małady čałaviek pahadziŭsia dać śviedčańni i pakazaŭ śledčym miesca, dzie schavaŭ cieła dziaŭčyny. Heta adbyłosia na dziasiaty dzień pošukaŭ. Śledztvam zajmajecca abłasnaja prakuratura.
Zdareńnie spravakavała nadzvyčajny rozhałas u nievialikim haradzkim pasiołku. Pakul dziaŭčynu šukali, padzieja abrastała samymi nievierahodnymi versijami i čutkami. Nibyta jaje bačyli ŭ kampanii nieznajomych maładych ludziej, albo ŭvohule pieraapranutuju ŭ paryku ŭ adnoj z kramaŭ pasiołku. A ŭsio tamu, što heta nia pieršy vypadak zabojstva maładych dziaŭčat u Kareličach. Dva hady tamu maładaja žycharka pasiołku viartałasia z Navahradku damoŭ i sieła ŭ vypadkovaje aŭto ź nieznajomymi maładymi ludźmi. Dziaŭčyna pahadziłasia pajechać ź imi ŭ Miensk pry ŭmovie, što jaje adviazuć nazad. U vyniku niavyśvietlenych abstavinaŭ adzin z novych znajomcaŭ zadušyŭ dziaŭčynu j schavaŭ u dvary adnaho ź mienskich mikrarajonaŭ.
Kamientary