У Мёрскім раёне пажылы мужчына пайшоў у лес па ягады і знік. Пра яго знікненне стала вядома 14 верасня, калі яго брат звярнуўся ў міліцыю.
Да таго моманту мужчына адсутнічаў дома ўжо тры дні. Высветлілася, што апошні раз яго бачылі на сцежцы, якая вядзе да балота.
На пошукі ў раён вёскі Малая Кавалеўшчына, акрамя супрацоўнікаў міліцыі, адразу ж выехалі ратавальнікі і вайскоўцы. Яны прачэсвалі мясцовасць па квадратах, а таксама выкарыстоўвалі квадракоптар.
Пошукі ўскладнялі асаблівасці ўчастку: балоты з вялікай колькасцю кустоў і густы лес. Яны цягнуліся ўвесь светлы дзень, прыпыняліся толькі на цёмны час сутак.
16 верасня пенсіянера нарэшце знайшлі — пачулі слабы стогн з зараснікаў чароту. 66‑гадовы мужчына не мог гаварыць, ён атрымаў пераахаладжэнне і вельмі аслабеў. Яго вынеслі з лесу на насілках і перадалі медыкам.
Каментары