У Маскве памёр адзін з галоўных архітэктараў Перабудовы ў СССР, савецкі партыйны дзеяч і вучоны-эканаміст Вадзім Мядзведзеў. Яму было 96 гадоў, і ён заставаўся апошнім з жывых членаў Палітбюро ЦК КПСС, якое існавала да скасавання 6-га артыкула Канстытуцыі СССР аб кіраўнічай ролі камуністычнай партыі ў сакавіку 1990 года.
Вадзім Мядзведзеў нарадзіўся 29 сакавіка 1929 года ў вёсцы Моханькава Яраслаўскай губерні. Скончыў эканамічны факультэт Ленінградскага дзяржаўнага ўніверсітэта, абараніў кандыдацкую і доктарскую дысертацыі па эканамічнай тэматыцы.
Працяглы час займаў кіраўнічыя пасады ў партыйнай сістэме: быў сакратаром Ленінградскага гаркама, намеснікам загадчыка аддзела прапаганды ЦК КПСС, рэктарам Акадэміі грамадскіх навук пры ЦК КПСС (1978—1983), загадчыкам аддзела навукі і навучальных устаноў ЦК (1983—1986), сакратаром ЦК (1986—1990). У 1988-1990 гадах быў членам Палітбюро ЦК КПСС, старшынёй Ідэалагічнай камісіі.
Належаў да блізкага кола Міхаіла Гарбачова і падтрымліваў дэмакратычныя змены ў грамадстве.
Курыруючы ў ЦК пытанні ідэалогіі, Вадзім Мядзведзеў унёс значны ўклад у ідэалагічную і інфармацыйную лібералізацыю: ініцыяваў адмену забароны на пэўныя выданні, зняцце абмежаванняў на падпіску, вяртанне ў агульны доступ літаратуры са «спецхранаў», у тым ліку твораў Аляксандра Салжаніцына і Льва Троцкага. Удзельнічаў у падрыхтоўцы актаў па юрыдычнай адмене пазасудовых рашэнняў у дачыненні да рэпрэсаваных у сталінскія часы. Восенню 1989 года ініцыяваў замену ў вышэйшых навучальных установах курсаў гісторыі КПСС і навуковага камунізму курсам сацыяльна-палітычнай гісторыі.
Пасля краху камунізму і распаду СССР ад палітычнай дзейнасці адышоў, працаваў у Інстытуце эканомікі РАН і супрацоўнічаў з «Гарбачоў-Фондам».
Вадзім Мядзведзеў пасля смерці ў лютым мінулага года былога старшыні Савета міністраў СССР Мікалая Рыжкова заставаўся адзіным жывым членам Палітбюро ЦК КПСС, абраным у склад гэтага фактычна ключавога савецкага органа ўлады яшчэ да скасавання 6-га артыкула Канстытуцыі СССР аб кіраўнічай ролі камуністычнай партыі ў сакавіку 1990 года. Пасля таго Палітбюро хоць і існавала далей, аж да жніўня 1991 года, але сваю ранейшую ролю страціла.
Каментары