Студэнта пільнавалі каля інтэрната за дзень да абароны дыплома. Затрымалі і далі 15 сутак
Студэнта БНТУ Сяргея Верамеюка затрымалі за дзень да абароны дыплома. Хлопец прыехаў у Мінск, каб скончыць універсітэт, а ў выніку патрапіў за краты на 15 сутак.
Сяргею 23 гады, ён вучыцца на інжынера і сканчвае апошні курс. Займаецца музыкай — запісвае песні па-беларуску.
Хлопца затрымалі 14 чэрвеня ў 11:20. Ён толькі прыехаў з дома з Брэста, дабіраўся з вакзала да інтэрната. На наступны дзень у яго мусіла быць абарона дыплома, і ён хацеў падрыхтавацца. Каля ўвахода ў інтэрнат яго спынілі двое ў масках і кепках. Прадставіліся міліцыянтамі, папрасілі прайсці з імі ў машыну. Сяргей толькі спытаў: «А вы мяне вернеце?»
Не вярнулі. Хлопца адвезлі ў Савецкае РУУС, а пасля — на Акрэсціна.
«Мы доўга не ведалі, за што яго затрымалі. Чакалі, што суд будзе яшчэ ў аўторак, дзяжурылі ў судзе. Але пасяджэнне паставілі на сёння. Час паведамілі за 10 хвілін да пачатку, а спісы павесілі за 5 хвілін», — распавёў «Нашай Ніве» сябра Сяргея.
На хлопца склалі пратакол за «непадпарадкаванне» (артыкул 24.3 КаАП). Напісалі, што калі яго затрымалі для ўстанаўлення асобы, то ён «стаў упірацца нагамі ў зямлю, хапацца за дзверы аўтамабіля».
Сведка-міліцыянт на судзе казаў, што нібыта раней па тым адрасе было здзейснена злачынства, таму яны разам з ГУБАЗіКам правяралі падазроных асоб. Студэнт прыцягнуў увагу, бо ішоў з торбай. Яны яго спынілі, каб праверыць, ці прыцягваўся раней да адказнасці, ці быў у вышуку.
Сяргей тлумачыў, што ніякага непадпарадкавання не было, ён спакойна прайшоў з супрацоўнікамі.
«Я прыехаў, каб абараніць дыплом і з’ехаць дадому есці маміны катлеты, адпрацоўваць два гады», — казаў хлопец падчас пасяджэння.
Суддзя Марына Фёдарава выслухала ўсё і вынесла пакаранне ў 15 сутак.
Дагэтуль Сяргея затрымлівалі на 25 сакавіка. Ён праважаў дзяўчыну на праспекце Незалежнасці. Тады яму далі 15 сутак — частку з іх ён правёў на Акрэсціна, частку ў Жодзіне.
Сям’я спыталася ў дэканаце, ці зможа Сяргей абараніць дыплом пасля вызвалення. Там паабяцалі што-небудзь прыдумаць. Горшы варыянт — прыйсці на абарону праз год.
Каментары