Яму 56 гадоў. Сёлета ў спадара Жэбрака выявілі рак левага бронха, ён да апошняга змагаўся з хваробай.
Родам Валерый Жэбрак з Ваўкавыска. Ягоны бацька Міхаіл быў у свой час дэпутатам Вярхоўнага Савета БССР, упаўнаважаным прадстаўніком Беларусі ў СНД (1993—1997). Бацька яшчэ жывы, менавіта яго апошнія гады даглядаў сын — гэта было ягонай асноўнай працай.
Да гэтага Валерый Жэбрак быў электрыкам. Ездзіў на заробкі ў Маскву і Ханты-Мансійск. «Бацька заўсёды быў дэмакратычных і патрыятычных поглядаў, колькі сябе помню», — кажа ягоны сын Ілля Жэбрак.
Спадара Валерыя не стала 19 жніўня, яму стала кепска, калі прыйшоў да дактароў. Праваахоўныя органы ўсё яшчэ не называюць прычыну смерці. «Можа быць, рак, а можа, сэрца», — кажа сын.
Маладафронтавец Зміцер Дашкевіч гаворыць, што Валерый Жэбрак амаль штопятніцу пасля талакі ў Курапатах прыязджаў ва ўрочышча на сваім басіку, каб вывезці брусы, абрэзкі, усё, што заставалася пасля ўсталявання крыжоў.
«Яго аднойчы затрымалі з расцяжкай «Курапаты — дарога смерці», але спадар Валерый змог зрабіць усё, каб пратакол не склалі», — расказвае Дашкевіч.
Каментары