Жыхара Гомеля, які судзіцца з падатковай наконт дэкрэта аб дармаедстве, вызвалілі ад выплаты збору
Аляксандр Сямёнаў, які падаў пазоў у суд на падатковую інспекцыю, што адправіла яму «ліст шчасця», вызвалены ад выплаты збору.
У пятніцу, 17 лютага, адбылося шостае па ліку пасяджэнне, на якім было прынята рашэнне вызваліць ад выплаты збору на фінансаванне дзяржвыдаткаў 82 чалавекі. Сярод іх - 53-гадовы гамяльчанін Аляксандр Сямёнаў, паведамляе газета «Гомельскія ведамасці».
Нагадаем, у лістападзе мужчына атрымаў «ліст шчасця» з падатковай. Абскардзіў яго спачатку ў раённай, затым у абласной інспекцыі. Калі атрымаў адмову, звярнуўся ў суд. У сваім пазове Аляксандр просіць прызнаць дэкрэт прэзідэнта супярэчным Канстытуцыі, а яго самога - чалавекам, які ўдзельнічае ў фінансаванні дзяржаўных расходаў.
21 лютага ў судзе Цэнтральнага раёна павінна адбыцца чарговае судовае паседжаньне па пазове Сямёнава, аднак 20 лютага стала вядома, што мужчыну ад выплаты збору вызвалілі. Камісія ўлічыла шэраг аб'ектыўных прычын, сярод іх - працоўны стаж, а таксама той факт, што гамяльчанін працаваў на зямельным участку ў 2015 годзе, і іншыя аспекты і вызваліла гамяльчаніна ад неабходнасці выплаты збору на фінансаванне дзяржаўных выдаткаў.
Каментары