У фаворы ва ўладаў. Чыжа ў нефармальнай камандзе Лукашэнкі змяніў Машэнскі
Асноўны ўладальнік «Санта Брэмара» і «Савушкіна прадукта» Аляксандр Машэнскі ўсё часцей з'яўляецца ў кампаніі прэзідэнта на забаўляльных мерапрыемствах. Пра гэта распавялі інфармаваныя крыніцы.
Учорашняе паведамленне пра затрыманне Юрыя Чыжа нарадзіла пытанне, хто ж заняў яго месца ў камандзе прэзідэнта, якая суправаджае Аляксандра Лукашэнку на адпачынку, канцэртах і іншых падобных мерапрыемствах.
«Машэнскага сталі часцей прыцягваць. Наколькі ведаю, ён быў у Сочы [падчас кароткатэрміновага адпачынку прэзідэнта]. Ён, Шакуцін, Захараў, Цяцерын… Ну гэта значыць традыцыйная група падтрымкі з бізнесменаў, спартсменаў, сяброў, прыгожых дзяўчат», — кажа інфармаваная крыніца.
Зрэшты, суразмоўцы нагадваюць, што ні для каго не было сакрэтам, што «Аляксандр Міхайлавіч быў у фаворы ва ўладаў». «Можа, не ўсе яго ініцыятывы знаходзілі падтрымку і яму не ўсё было дазволена, але яго ўваходжанне ў гэтую «тусоўку» — гэта не сенсацыя», мяркуюць крыніцы.
У 2010 годзе Аляксандр Машэнскі уваходзіў у лік давераных асоб кандыдата ў прэзідэнты Аляксандра Лукашэнкі. Пасля гэтага бізнэсмэна хацелі зрабіць неўязным у Еўрасаюз. Але яму ўдалося абараніцца, развеяць сумненні і, больш за тое, наладзіць пастаўкі сваёй прадукцыі ў ЕС.
«Усім вядома, што Аляксандр Рыгоравіч [Лукашэнка] дапамог Машэнскаму адкрыць дзверы на расійскі рынак. Калі іх не пускалі з вялікімі аб'ёмамі ў Расію, менавіта ўмяшальніцтва Лукашэнка спрыяла гэтаму. Гэта адна з прычын якая ёсць сёння статус-кво», — нагадвае суразмоўца.
Па выніках 2014 года выручка холдынгу Аляксандра Машэнскага перавысіла мільярд даляраў. Толькі «Савушкін прадукт» і «Санта Брэмар» акумулявалі 480 і 442 млн даляраў адпаведна, піша «Ежедневнік», паводле версіі якога Машэнскі заняў трэцяе месца ў рэйтынгу самых уплывовых беларускіх бізнесменаў. Пасля ўвядзення Расіяй прадуктовага эмбарга ў дачыненні да заходніх краін пазіцыі малочнага і рыбнага бізнэсаў прадпрымальніка з Брэста яшчэ больш ўзмацніліся.
Нельга не згадаць пра грамадскую дзейнасць Аляксандра Машэнскага. Бізнэсмэн з'яўляецца членам Савета па развіцці прадпрымальніцтва ў Беларусі і Савета па развіцці экспарту і тавараправоднай сеткі за мяжой, з'яўляецца ганаровым консулам Ісландыі ў Беларусі і старшынёй Беларускай федэрацыі веславання, уваходзіць у назіральную раду Банка развіцця.
Аляксандр Машэнскі пакуль недаступны для каментароў.
Каментары