Вялікія банкі зладжана апусцілі стаўкі па рублёвых дэпазітах
У лістападзе адбылася адна важная падзея, пра якую афіцыйна не паведамлялася. Па прапанове Нацбанка камерцыйныя банкі ўзялі на сябе абавязацельства знізіць працэнтныя стаўкі па дэпазітах.
Як расказалі БелаПАН банкіры, адпаведны мемарандум, які прадугледжвае зніжэнне ставак, быў падпісаны 26 лістапада.
Як вынік, да цяперашняга часу практычна ўсе вядучыя банкі апусцілі стаўкі па дэпазітах для юрыдычных асоб да 35%, а стаўкі па дэпазітах для насельніцтва не перавышаюць цяпер 45% гадавых.
Выключэнне складаюць невялікія банкі, якія не падпісвалі мемарандум і пакуль яшчэ захоўваюць больш высокія стаўкі па ўкладах.
Хоць і гэтыя банкі таксама вымушаныя будуць раўняцца на ўвесь рынак і знізяць з часам стаўкі. У абмен на ўзятыя абавязацельствы па зніжэнні працэнтных ставак Нацбанк, як распавядаюць банкіры, даў камерцыйным банкам гарантыі, што ў выпадку неабходнасці падтрымае апошніх ліквіднасцю.
Па словах банкіраў, Нацбанк рэкамендаваў ім зніжаць працэнтныя стаўкі яшчэ ў кастрычніку.
Аднак, трымаючыся на той момант за дэпазіты насельніцтва як за адну з нешматлікіх крыніц рублёвых рэсурсаў, банкі не рызыкавалі зніжаць працэнтныя стаўкі.
«У канцы лістапада сітуацыя змянілася. Нацбанк прапанаваў камбанкам магчымасць рэальна прыцягваць у яго рэсурсы пад 35 % гадавых, і таму банкі цяпер больш спакойна гатовыя зніжаць стаўкі па дэпазітах, разумеючы, што ў выпадку адтоку рублёвых укладаў Нацбанк акажа рэсурсную падтрымку», — расказаў адзін з банкіраў.
Даўшы банкам магчымасць атрымліваць эмісійныя рэсурсы, цэнтрабанк пры гэтым давёў да камбанкаў настойлівую рэкамендацыю абмежаваць прырост крэдытнага партфеля адным працэнтам у месяц.
«Нацбанк стымулюе зніжэнне працэнтных ставак, што нібыта азначае паслабленне грашова-крэдытнай палітыкі, аднак, калі аб'ём крэдытавання эканомікі будзе рэальна абмежаваны, то праблем на грашовым рынку з прычыны зніжэння працэнтных ставак не павінна ўзнікнуць», — мяркуе старшы аналітык Forex Club Валерый Палхоўскі.
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары